శ్రీసూర్య నవావరణ స్తోత్రం

 శ్రీసూర్య నవావరణ స్తోత్రం

ఆదిత్యాష్టకం

ఉదయాద్రిమస్తకమహామణిం లసత్- కమలాకరైకసుహృదం మహౌజసం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 1 తిమిరాపహారనిరతం నిరామయం నిజరాగరంజితజగత్త్రయం విభుం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 2 దినరాత్రిభేదకరమద్భుతం పరం సురవృందసంస్తుతచరిత్రమవ్యయం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 3 శ్రుతిసారపారమజరామయం పరం రమణీయవిగ్రహముదగ్రరోచిషం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 4 శుకపక్షతుండసదృశాశ్వమండలం అచలావరోహపరిగీతసాహసం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 5 శ్రుతితత్త్వగమ్యమఖిలాక్షిగోచరం జగదేకదీపముదయాస్తరాగిణం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 6 శ్రితభక్తవత్సలమశేషకల్మష- క్షయహేతుమక్షయఫలప్రదాయినం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 7 అహమన్వహం సతురగక్షతాటవీ శతకోటిహాలకమహామహీధనం . గదపంకశోషణమఘౌఘనాశనం శరణం గతోఽస్మి రవిమంశుమాలినం - 8 ఇతి సౌరమష్టకమహర్ముఖే రవిం ప్రణిపత్య యః పఠతి భక్తితో నరః . స విముచ్యతే సకలరోగకల్మషైః సవితుస్సమీపమపి సమ్యగాప్నుయాత్ - 9 ఇతి ఆదిత్యాష్టకం సమాప్తం ..

 శ్రీ సూర్య నవార్య స్తోత్రం

 శ్రీ సప్తార్య స్తోత్రం

 చక్షుషోపనిషత్

-------------------------

-------------------------

శ్రీమహాభారతోక్తం యుధిష్ఠిరవిరచితం శ్రీసూర్యస్తోత్రం

శ్రీమహాభారతోక్తం యుధిష్ఠిరవిరచితం శ్రీసూర్యస్తోత్రం

--------------------------------------------------------------------------------------

త్వం భానో జగతశ్చక్షుస్త్వమాత్మా సర్వదేహినాం .

త్వం యోనిః సర్వభూతానాం త్వమాచారః క్రియావతాం .. 1..

త్వం గతిః సర్వసాంఖ్యానాం యోగినాం త్వం పరాయణం .

అనావృతార్గలద్వారం త్వం గతిస్త్వం ముముక్షతాం .. 2..

త్వయా సంధార్యతే లోకస్త్వయా లోకః ప్రకాశ్యతే .

త్వయా పవిత్రీక్రియతే నిర్వ్యాజం పాల్యతే త్వయా .. 3..

త్వాముపస్థాయ కాలే తు బ్రాహ్మణా వేదపారగాః .

స్వశాఖావిహితైర్మంత్రైరర్చత్యృషిగణార్చిత .. 4..

తవ దివ్యం రథం యాంతమనుయాంతి వరార్థినః .

సిద్ధచారణగధర్వా యక్షగుహ్యకపన్నగాః .. 5..

త్రయస్త్రింశచ్చ వై దేవాస్తథా వైమానికా గణాః .

సోపేంద్రాః సమహేంద్రాశ్చ త్వామిష్ట్వా సిద్ధిమాగతాః .. 6..

ఉపయాంత్యర్చయిత్వా తు త్వాం వై ప్రాప్తమనోరథాః .

దివ్యమందారమాలాభిస్తూర్ణం విద్యాధరోత్తమాః .. 7..

గుహ్యాః పితృగణాః సప్త యే దివ్యా యే చ మానుషాః .

తే పూజయిత్వా త్వామేవ గచ్ఛంత్యాశు ప్రధానతాం .. 8..

వసవో మరుతో రుద్రా యే చ సాధ్యా మరీచిపాః .

వాలఖిల్యాదయః సిద్ధాః శ్రేష్ఠత్వం ప్రాణినాం గతాః .. 9..

సబ్రహ్మకేషు లోకేషు సప్తస్వప్యఖిలేషు చ .

న తద్భూతమహం మన్యే యదర్కాదతిరిచ్యతే .. 10..

సంతి చాన్యాని సత్త్వాని వీర్యవంతి మహాంతి చ .

న తు తేషాం తథా దీప్తిః ప్రభవో వా యథా తవ .. 11..

జ్యోతీంషి త్వయి సర్వాణి త్వం సర్వజ్యోతిషాం పతిః .

త్వయి సత్యం చ సత్త్వం చ సర్వే భావాశ్చ సాత్త్వికాః .. 12..

త్వత్తేజసా కృతం చక్రం సునాభం విశ్వకర్మణా .

దేవారీణాం మదో యేన నాశితః శార్ఙ్గధన్వనా .. 13..

త్వమాదాయాంశుభిస్తేజో నిదాఘే సర్వదేహినాం .

సర్వౌషధిరసానాం చ పునర్వర్షాసు ముంచసి .. 14..

తపంత్యన్యే దహంత్యన్యే గర్జంత్యన్యే యథా ఘనాః .

విద్యోతంతే ప్రవర్షంతి తవ ప్రావృషి రశ్మయః .. 15..

న తథా సుఖయత్యగ్నిర్న ప్రావారా న కంబలాః .

శీతవాతార్దితం లోకం యథా తవ మరీచయః .. 16..

త్రయోదశద్వీపవతీం గోభిర్భాసయసే మహీం .

త్రయాణామపి లోకానాం హితాయైకః ప్రవర్తసే .. 17..

తవ యద్యుదయో న స్యాదంధం జగదిదం భవేత్ .

న చ ధర్మార్థకామేషు ప్రవర్తేరన్మనీషిణః .. 18..

ఆధానపశుబంధేష్టిమంత్రయజ్ఞతపక్రియాః .

త్వత్ప్రసాదాదవాప్యంతే బ్రహ్మక్షత్రవిశాం గణైః .. 19..

యదహర్బ్రహ్మణః ప్రోక్తం సహస్రయుగసమ్మితం .

తస్య త్వనాదిరంతశ్చ కాలజ్ఞైః పరికీర్తితః .. 20..

మనూనాం మనుపుత్రాణాం జగతోఽమానవస్య చ .

మన్వంతరాణాం సర్వేషామీశ్వరాణాం త్వమీశ్వరః .. 21..

సంహారకాలే సంప్రాప్తే తవ క్రోధవినిఃసృతః .

సంవర్తకాగ్నిస్త్రైలోక్యం భస్మీకృత్యావతిష్ఠతే .. 22..

త్వద్దీధితిసముత్పన్నా నానావర్ణా మహాధనాః .

సైరావతాః సాశనయః కుర్వంత్యాభూతసంప్లవం .. 23..

కృత్వా ద్వాదశధాత్మానం ద్వాదశాదిత్యతాం గతః .

సంహృత్యైకార్ణవం సర్వం త్వం శోషయసి రశ్మిభిః .. 24..

త్వామింద్రమాహుస్త్వం రుద్రస్త్వం విష్ణుస్త్వం ప్రజాపతిః .

త్వమగ్నిస్త్వం మనః సూక్ష్మం ప్రభుస్త్వం బ్రహ్మ శాశ్వతం .. 25..

త్వం హంసః సవితా భానురంశుమాలీ వృషాకపిః .

వివస్వాన్మిహిరః పూషా మిత్రో ధర్మస్తథైవ చ .. 26..

సహస్రరశ్మిరాదిత్యస్తపనస్త్వం గవాం పతిః .

మార్తండోఽర్కో రవిః సూర్యః శరణ్యో దినకృత్తథా .. 27..

దివాకరః సప్తసప్తిర్ధామకేశీ విరోచనః .

ఆశుగామీ తమోఘ్నశ్చ హరితాశ్వశ్చ కీర్త్యసే .. 28..

సప్తమ్యామథవా షష్ట్యాం భక్త్యా పూజాం కరోతి యః .

అనిర్విణ్ణోఽనహంకారీ తం లక్ష్మీర్భజతే నరం .. 29..

న తేషామాపదః సంతి నాధయో వ్యాధయస్తథా .

యే తవానన్యమనసా కుర్వత్యర్చనవందనం .. 30..

సర్వరోగైర్విరహితాః సర్వపాపవివర్జితాః .

త్వద్భావభక్తాః సుఖినో భవంతి చిరజీవినః .. 31..

త్వం మమాపన్నకామస్య సర్వాతిథ్యం చికీర్షతః .

అన్నమన్నపతే దాతుమమితః శ్రద్ధయార్హసి .. 32..

యే చ తేఽనుచరాః సర్వే పాదోపాంతం సమాశ్రితాః .

మాఠరారుణదండాద్యాస్తాంస్తాన్వందేఽశనిక్షుభాన్ .. 33..

క్షుభయా సహితో మైత్రీ యాశ్చాన్యా భూతమాతరః .

తాశ్చ సర్వా నమస్యామి పాంతు మాం శరణాగతం .. 34..

ఏవం స్తుతో మహారాజ భాస్కరో లోకభావనః .

తతో దివాకరః ప్రీతో దర్శయామాస పాండవం .. 35..

దీప్యమానః స్వవపుషా జ్వలన్నివ హుతాశనః .

వివస్వానువాచ ..

యత్తేఽభిలషితం కించిత్తత్త్వం సర్వమవాప్స్యసి .. 36..

అహమన్నం ప్రదాస్యామి సప్త పంచ చ తే సమాః .

గృహ్ణీష్వ పిఠరం తామ్రం మయా దత్తం నరాధిప .. 37..

యావద్వర్త్స్యతి పాంచాలీ పాత్రేణానేన సువ్రత .

ఫలమూలామిషం శాకం సంస్కృతం యన్మహానసే .. 38..

చతుర్విధం తదన్నాద్యమక్షయ్యం తే భవిష్యతి .

ఇతశ్చతుర్దశే వర్షే భూయో రాజ్యమవాప్స్యసి .. 39..

వైశంపాయన ఉవాచ ..

ఏవముక్త్వా తు భగవాంస్తత్రైవాంతరధీయత .

ఇమం స్తవం ప్రయతమనాః సమాధినా పఠేదిహాన్యోఽపి వరం సమర్థయన్ .. 40..

తత్తస్య దద్యాచ్చ రబిర్మనీషితం తదాప్నుయాద్యద్యపి తత్సుదుర్లభం .

యశ్చేదం ధారయేన్నిత్యం శృణుయాద్వాప్యభీక్ష్ణశః .. 41..

పుత్రార్థీ లభతే పుత్రం ధనార్థీ లభతే ధనం .

విద్యార్థీ లభతే బ్రిద్యా పురుషోఽప్యథవా స్త్రియః .. 42..

ఉభే సంధ్యే జపేన్నిత్యం నారీ వా పురుషో యది .

ఆపదం ప్రాప్య ముచ్యేత బద్ధో ముచ్యేత బంధనాత్ .. 43..

ఇతి శ్రీమహాభారతోక్తం యుధిష్ఠిరవిరచితం శ్రీసూర్యస్తోత్రం సంపూర్ణం ..

50 - Bharatham - 13 Adyamam - Dharma Raja Prokta Surya Stotram by jayahanumanji on Scribd

శ్రీసూర్యమాలా

 శ్రీ సూర్యమాలా

అస్య శ్రీసూర్యమాలాస్తోత్రమహామంత్రస్య భగవాన్ విసిష్ఠఋషిః .

అనుష్టుప్చ్ఛందః, శ్రీసూర్యనారాయణో దేవతా .

హ్రాం బీజం, హ్రీం శక్తిః హ్రూం కీలకం

శ్రీసూర్యనారాయణదేవతాప్రసాదసిద్ధ్యర్థే జపేవినియోగః .

 న్యాసౌ - కరన్యాసః           హృదయన్యాసః

ఓం హ్రాం అఘోర శ్రీసూర్యనారాయణాయ - అంగుష్ఠాభ్యాం నమః - హృదయాయనమః .

ఓం హ్రీం చతుర్వేదపారాయణాయ - తర్జనీభ్యాం నమః - శిరసేస్వాహా .

ఓం హ్రూం ఉగ్రభయంకరాయ - మధ్యమాభ్యాం నమః - శిఖాయై వషట్ .

ఓం హ్రైం శ్రీసూర్యనారాయణాయ - అనామికాభ్యాం నమః - కవచాయ హుం .

ఓం హ్రౌం కౌపీనమౌంజీధరాయ - కనిష్ఠికాభ్యాం నమః - నేత్రత్రయాయ వౌషట్ .

ఓం హ్రః సహస్రకిరణాయ      కరతలకరపృష్ఠాభ్యాం నమః - అస్త్రాయ ఫట్ .

భూర్భువస్స్వరోమితి దిగ్బంధః .

ధ్యానం .

హరితహయరథం దివాకరం కనకమయాంబుజరేణువంజరం .

ప్రతిదినముదయే నవం నవం శరణముపైమి హిరణ్యకేతనం ..

దేదీప్యమానమకుటం మణికుండలమండితం .

ధ్యాయేత్సహస్రకిరణం స్తోత్రమేవముదీరయేత్ ..

లమితి పంచపూజాం పరికల్పయామి .

గురుర్బ్రహ్మా గురుర్విష్ణుః గురుదేవో మహేశ్వరః .

గురుస్సాక్షాత్ పరబ్రహ్మ తస్మై శ్రీగురవేనమః ..

అథ మాలాప్రారంభః  -

అస్య శ్రీసూర్యనారాయణాయ-సుదర్శన-చక్రపాణిధ్వజాయ,

బంధుపోషణ-స్వరూపాయ, సకలదిఙ్మండలాయ, శతకోటి విష్ణుభుజంగ-

జగదాధారాయ, శౌర్యపరాక్రమాయ, నవగ్రహఘటనాఘటనాయ,

స్థలగ్రహఘటనాఘటనాయ, గ్రహనిర్మూలనాయ ఓం హ్రాం హ్రీం

సర్వభూతప్రేతపిశాచబద్ధబ్రహ్మరాక్షసహరణాయ, అనేకరాక్షస-

స్థలజంతుఖండనాయ, పరతంత్ర-పరవర్మ-పరజపాదీన్ ధ్వంసయ విధ్వంసయ,

అఘోరవీర శ్రీసూర్యనారాయణాయ ఆత్మయస్త్రమంత్రతంత్రసంరక్షణాయ,

మమ సకలరోగనివారణాయ మారణశల్యోచ్చాటనాది

సర్వాంగక్రియావిచ్ఛేదనాయ - ఓం భగ భగ భుగ భుగ,

చండప్రచండశౌర్యపరాక్రమాయ, బహులోద్ఘటనాయ,

పూర్వద్వారే బంధ బంధ, దక్షిణద్వారే బంధ బంధ

పశ్చిమద్వారే బంధ బంధ . ఉత్తరద్వారే బంధ బంధ,

ఆగ్నేయద్వారే బంధ బంధ, నైరృతిద్వారే బంధ బంధ,

వాయవ్యద్వారే బంధ బంధ ఈశానద్వారే బంధ బంధ,

అష్టదిక్షు బంధ బంధ, నవగ్రహాన్ బంధ బంధ,

స్థలగ్రహాన్ బంధ బంధ, కహ కహ, కిరి కిరి,

వివి వివి, హల హల, కట కట, చట చట,

ప్రచట ప్రచట, స్ఫుర స్ఫుర, ఫేల ఫేల, ఫేట ఫేట,

సర్వశూన్యనివారణాయ, ఇంద్రజాల, మహేంద్రజాల,

రణస్తంభన, ఖడ్గస్తంభన, ఖడ్గగాండీవవిచ్ఛేదనాయ,

ఆకర్షయ అకర్షయ, గజకర్ణ-గోకర్ణ తర్విద్యాద్యాః

ధర్మవిద్యాః బంధ బంధ, భూలోక-భువర్లోక-సువర్లోక-

పాతాలలోక-ప్రహరణాయ ఓం ఫట్ స్వాహా .

అస్య సూర్యమాలా అస్త్రాయ ఫట్ .

స్వర్భువర్భూరోమితి దిగ్విమోకః .

అనేన మయా కృతేన శ్రీసూర్యనారాయణస్తృప్యతు .

పరబ్రహ్మార్పణమస్తు .

హరిః ఓం తత్ సత్ .

 సాంబపంచాశికా

-----------------------------------------------

-----------------------------------------------

శబ్దార్థత్వవివర్తమానపరమజ్యోతీరుచో గోపతే-

     రుద్గీథోఽభ్యుదితః పురోఽరుణతయా యస్య త్రయీమండలం .

భావ్యద్వర్ణపదక్రమేరితతమః సప్తస్వరాశ్వైర్వియద్-

     విద్యాస్యందనమున్నయన్నివ నమస్తస్మై పరబ్రహ్మణే .. 1..

ఓమిత్యంతర్నదతి నియతం యః ప్రతిప్రాణి శబ్దో

     వాణీ యస్మాత్ప్రసరతి పరశబ్దతన్మాత్రగర్భా .

ప్రాణాపానౌ వహతి చ సమౌ యో మిథో గ్రాససక్తౌ

     దేహస్థం తం సపది పరమాదిత్యమాద్యం ప్రపద్యే .. 2..

యస్త్వక్చక్షుఃశ్రవణరసనాఘ్రాణపాణ్యంఘ్రివాణీ-

     పాయూపస్థస్థితిరపి మనోబుహ్యద్ధ్యహంకారమూర్తిః .

తిష్ఠత్యంతర్బహిరపి జగద్భాసయంద్వాదశాత్మా

     మార్తండం తం సకలకరణాధారమేకం ప్రపద్యే .. 3..

యా సా మిత్రావరుణసదనాదుచ్చరంతీ త్రిషష్టిం

     వర్ణానత్ర ప్రకటకరణైః ప్రాణసంగాత్ప్రసూతాన్ .

తాం పశ్యంతీం ప్రథమముదితాం మధ్యమాం బుద్ధిసంస్థాం

     వాచం వక్త్రే కరణవిశదాం వైఖరీం చ ప్రపద్యే .. 4..

ఊర్ధ్వాధఃస్థాన్యతనుభువనాన్యంతరా సన్నివిష్టా

     నానానాడిప్రసవగహనా సర్వభూతాంతరస్థా .

ప్రాణాపానగ్రసననిరతైః ప్రాప్యతే బ్రహ్మనాడీ

     సా నః శ్వేతా భవతు పరమాదిత్యమూర్తిః ప్రసన్నా .. 5..

న బ్రహ్మాండవ్యవహితపథా నాతిశీతోష్ణరూపా

     నో వా నక్తందివగమమితాఽతాపనీయాపరాహుః .

వైకుంఠీయా తనురివ రవే రాజతే మండలస్థా

     సా నః శ్వేతా భవతు పరమాదిత్యమూర్తిః ప్రసన్నా .. 6..

యత్రారూఢం త్రిగుణవపుషి బ్రహ్మ తద్బిందురూపం

     యోగీంద్రాణాం యదపి పరమం భాతి నిర్వాణమార్గః .

త్రయ్యాధారః ప్రణవ ఇతి యన్మండలం చండరశ్మే-

     రంతఃసూక్ష్మం బహిరపి బృహన్ముక్తయేఽహం ప్రపన్నః .. 7..

యస్మిన్సోమః సురపితృనరైరన్వహం పీయమానః

     క్షీణః క్షీణః ప్రవిశతి యతో వర్ధతే చాపి భూయః .

యస్మిన్వేదా మధుని సరధాకారవద్భంతి చాగ్రే

     తచ్చండాంశోరమితమమృతం మండలస్థం ప్రపద్యే .. 8..

ఐంద్రీమాశాం పృథుకవపుషా పూరయిత్వా క్రమేణ

     క్రాంతాః సప్త ప్రకటహరిణా యేన పాదేన లోకాః .

కృత్వా ధ్వాంతం విగలితబలివ్యక్తి పాతాలలీనం

     విశ్వాలోకః స జయతి రవిః సత్త్వమేవోర్ధ్వరశ్మిః .. 9..

ధ్యాత్వా బ్రహ్మ ప్రథమమతను ప్రాణమూలే నదంతం

     దృష్ట్వా చాంతః ప్రణవముఖరం వ్యాహృతీః సమ్యగుక్త్వా .

యత్తద్వేదే తదితి సవితుర్బ్రహ్మణోక్తం వరేణ్యం

     తద్భర్గాఖ్యం కిమపి పరమం ధామగర్భం ప్రపద్యే .. 10..

త్వాం స్తోష్యామి స్తుతిభిరితి మే యస్తు భేదగ్రహోఽయం

     సైవావిద్యా తదపి సుతరాం తద్వినాశాయ యుక్తః .

స్తౌమ్యేవాహం త్రివిధముదితం స్థూలసూక్ష్మం పరం వా

     విద్యోపాయః పర ఇతి బుధైర్గీయతే ఖల్వవిద్యా .. 11..

యోఽనాద్యంతోఽప్యతనురగుణోఽణోరణీయాన్మహీయాన్-

     విశ్వాకారః సగుణ ఇతి వా కల్పనాకల్పితాంగః .

నానాభూతప్రకృతివికృతీర్దర్శయన్ భాతి యో వా

     తస్మై తస్మై భవతు పరమాదిత్య నిత్యం నమస్తే .. 12..

తత్త్వాఖ్యానే త్వయి మునిజనా నేతి నేతి బ్రువంతః

     శ్రాంతాః సమ్యక్త్వమితి న చ తైరీదృశో వేతి చోక్తః .

తస్మాత్తుభ్యం నమ ఇతి వచోమాత్రమేవాస్మి వచ్మి

     ప్రాయో యస్మాత్ప్రసరతితరాం భారతీ జ్ఞానశర్భా .. 13..

సర్వాంగీణః సకలవపుషామంతరే యోఽన్తరాత్మా

     తిష్ఠన్కాష్ఠే దహన ఇవ నో దృశ్యసే యుక్తిశూన్యైః .

యశ్చ ప్రాణారణిషు నియతైర్మథ్యమానాసు సద్భి-

     ర్దృశ్య జ్యోతిర్భవసి పరమాదిత్య తస్మై నమస్తే .. 14..

స్తోతా స్తుత్యః స్తుతిరితి భవాన్కర్తృకర్మక్రియాత్మా

     క్రీడత్యేకస్తవ నుతివిధావస్వతంత్రస్తతోఽహం .

యద్వా వచ్మి ప్రణయసుభగం గోపతే తచ్చ తథ్యం

     త్వత్తో హ్యన్యత్కిమివ జగతాం విద్యతే తన్మృషా స్యాత్ .. 15..

జ్ఞానం నాంతఃకరణరహితం విద్యతేఽస్మద్విధానాం

     త్వం చాత్యంతం సకలకరణాగోచరత్వాదచింత్యః .

ధ్యానాతీతస్త్వమితి న వినా భక్తియోగేన లభ్య-

     స్తస్మాద్భక్తిం శరణమమృతప్రాప్తయేఽహం ప్రపన్నః .. 16..

హార్దం హంతి ప్రథమముదితా యా తమఃసంశ్రితానాం

     సత్త్వోద్రేకాత్తదను చ రజః కర్మయోగక్రమేణ .

స్త్రభ్యస్తా చ ప్రథయతితరాం సత్త్వమేవ ప్రపన్నా

     నిర్వాణాయ వ్రజతి శమినాం తేఽర్క భక్తిస్త్రయీవ .. 17..

తామాసాద్య శ్రియమివ గృహే కామధేనుం ప్రవాసే

     ధ్వాంతే భాతిం ధృతిమివ వనే యోజనే బ్రహ్మనాడిం .

నావం చాస్మిన్ విషమవిషయగ్రాహసంసారసింధౌ

     గచ్ఛేయం తే పరమమమృతం యన్న శీతం న చోష్ణం .. 18..

అగ్నీషోమావఖిలజగతః కారణం తౌ మయూఖైః

     సర్గాదానే సృజసి భగవందాసవృద్ధిక్రమేణ .

తావేవాంతర్విషువతి సమౌ జుహ్వతామాత్మవహ్నౌ

     ద్వావప్యస్తం నయసి యుగపన్ముక్తయే భక్తిభాజాం .. 19..

స్థూలత్వం తే ప్రకృతిగహనం నైవ లక్ష్యం హ్యనంతం

     సూక్ష్మత్వం వా తదపి సదసద్వ్యక్త్యభావాదచింత్యం .

ధ్యాయామీత్థం కథమవిదితం త్వామనాద్యంతమంత-

     స్తస్మాదర్క ప్రణియిని మయి స్వాత్మనైవ ప్రసీద .. 20..

యత్తద్వేద్యం కిమపి పరమం శబ్దతత్త్వం త్వమంత-

     స్తత్సద్వ్యక్తిం జిగమిషు శనైర్లాంతి మాత్రాకలాః ఖే .

అవ్యక్తేన ప్రణవవపుషా బిందునాదోదితం స-

     చ్ఛబ్దబ్రహ్మోచ్చరతి కరణవ్యంజితం వాచకం తే .. 21..

ప్రాతఃసంధ్యారుణకిరణభాగృఙ్మ్యయం రాజసం యన్-

     మధ్యే చాపి జ్వలదివ యజుః శుక్లభాః సాత్త్వికం వా .

సాయం సామాస్తమితకిరణం యత్తమోల్లాసిరూపం

     సాహ్నః సర్గస్థితిలయవిధావాకృతిస్తే త్రయీవ .. 22..

యే పాతాలోదధిమునినగద్వీపలోకాధిబీజ-

     చ్ఛందోభూతస్వరముఖనదత్సప్తసప్తిం ప్రపన్నాః .

యే చైకాశ్వ నిరవయవవాగ్భావమాత్రాధిరూఢం

     తే త్వామేవ స్వరగుణకలావర్జితం యాంత్యనశ్వం .. 23..

దివ్యం జ్యోతిః సలిలపవనైః పూరయిత్వా త్రిలోకీ-

     మేకీభూతం పునరపి చ తత్సారమాదాయ గోభిః .

అంతర్లీనో విశసి వసుధాం తద్గతః సూయసేఽన్నం

     తచ్చ ప్రాణాంస్త్వమితి జగతాం ప్రాణభృత్సూర్య ఆత్మా .. 24..

అగ్నీషోమౌ ప్రకృతిపురుషౌ బిందునాదౌ చ నిత్యౌ

     ప్రాణాపానావషి దిననిశే యే చ సత్యానృతే ద్వే .

ధర్మాధర్మౌ సదసదుభయం యోఽన్తరావేశ్య యోగీ

     వర్తేతాత్మన్యుపరతమతిర్నిర్గుణం త్వాం విశేత్సః .. 25..

గర్భాధానప్రసవవిధయే సుప్తయోరిందుభాసా

     సాపత్న్యేనాభిముఖమివ ఖే కాంతయోర్మధ్యసంస్థః .

ద్యావాపృథ్వ్యోర్వదనకమలే గోముఖైర్బోధయిత్వా

     పర్యాయేణాపిబసి భగవన్ షడ్రసాస్వాదలోలః .. 26..

సోమం పూర్ణామృతమివ చరుం తేజసా సాధయిత్వా

     కృత్వా తేనానలముఖజగత్తర్పర్ణ వైశ్వదేవం .

ఆమావస్యం విధసమివ ఖే తత్కలాశేషమశ్నన్-

     బ్రహ్మాండాంతర్గృహపతిరివ స్వాత్మయాగం కరోషి .. 27..

కృత్వా నక్తందినమివ జగద్బీజమావ్యక్తికం యత్-

     తత్రైవాంతర్దినకర తథా బ్రాహ్మమన్యత్తతోఽల్పం .

దైవం పిత్ర్యం క్రమపరిగతం మానుషం చాల్పమల్పం

     కుర్వన్కకుర్వన్కలయసి జగత్పంచధావర్తనాభిః .. 28..

తత్త్వాలోకే తపన సుదినే యే పరం సంప్రబుద్ధా

     యే వా చిత్తోపశమరజనీయోగనిద్రాముపేతాః .

తేఽహోరాత్రోపరమపరమానందసంధ్యాసు సౌరం

     భిత్త్వా జ్యోతిఃపరమపరమం యాంతి నిర్వాణసంజ్ఞం .. 29..

ఆ బ్రహ్మేద నవమివ జగజ్జంగమస్థావరాంతం

     సర్గే సర్గే విసృజసి రవే గోభిరుద్రిక్తసోమైః .

దీప్తైః ప్రత్యాహరసి చ లయే తద్యథాయోని భూయః

     సర్గాంతాదౌ ప్రకటవిభవాం దర్శయన్ రశ్మిలీలాం .. 30..

శ్రిత్వా నిత్యోపచితముచితం బ్రహ్మతేజఃప్రకాశం

     రూపం సర్గస్థితిలయముచా సర్వభూతేషు మధ్యే .

అంతేవాసిష్వివ సుగురుణా యః పరోక్షః ప్రకృత్యా

     ప్రత్యక్షోఽసౌ జగతి భవతా దర్శితః స్వాత్మనాత్మా .. 31..

లోకాః సర్వే వపుషి నియతం తే స్థితిస్త్వం చ తేషా-

     మేకైకస్మిన్యుగపదగుణో విశ్వహేతోర్గుణీవ .

ఇత్థంభూతే భవతి భగవన్నత్వదన్యోఽస్మి సత్యం

     కిం తు జ్ఞస్త్వం పరమపురుషోఽహం ప్రకృత్యైవ చాజ్ఞః .. 32..

సంకల్పేచ్ఛాద్యఖిలకరణప్రాణవాణ్యో వరేణ్యాః

     సంపన్నా మే త్వదభినవనాజ్జన్మ చేదం శరణ్యం .

మన్యే చాస్తం జిగమిషు శనైః పుణ్యపాపద్వయం తద్-

     భక్తిశ్రద్ధే తవ చరణయోరన్యథా నో భవేతాం .. 33..

సత్యం భూయో జననమరణే త్వత్ప్రపన్నేషు న స్త-

     స్తత్రాప్యేకం తవ నుతిఫలం జన్మ యాచే తదిత్థం .

త్రైలోక్యేశః శమ ఇవ పరః పుణ్యకాయోఽప్యయోనిః

     సంసారాబ్ధౌ ప్లవ ఇవ జగత్తారణాయ స్థిరః స్యాం .. 34..

సౌషుమ్ణేన త్వమమృతపథేనైత్య శీతాంశుభావం

     పుష్ణాస్యగ్రే సురనరపితౄన్ శాంతభాభిః కలాభిః .

పశ్చాదంభో విశసి వివిధాశ్చౌషధీస్తద్గతోఽపి

     ప్రీణాస్యేవం త్రిభువనమతస్తే జగన్మిత్రతార్క .. 35..

మందాక్రాంతే తమసి భవతా నాథ దోషావసానే

     నాంతర్లీనా మమ మతిరియం గాఢనిద్రాం జహాతి .

తస్మాదస్తంగమితతమసా పద్మినీవాత్మభాసా

     సౌరీత్యేషా దినకర పరం నీయతామాశు బోధం .. 36..

యేన గ్రాసీకృతమివ జగత్సర్వమాసీత్తదస్తం

     ధ్వాంతం నీత్వా పునరపి విభో తద్దయాఘ్రాతచిత్తః .

ధత్సే నక్తందినమపి గతీ శుక్లకృష్ణే విభజ్య

     త్రాతా తస్మాద్భవ పరిభవే దుష్కృతే మేఽపి భానో .. 37..

ఆసంసారోపచితసదసత్కర్మబంధాశ్రితానా-

     మాధివ్యాధిప్రజనమరణక్షుత్పిపాసార్దితానాం .

మిథ్యాజ్ఞానప్రబలతమసా నాథ చాంధీకృతానాం

     త్వం నస్త్రాతా భవ కరుణయా యత్రతత్రస్థితానాం .. 38..

సత్యాసత్యస్ఖలితవచసాం శౌచలజ్జోజ్ఝీతా-

     నామజ్ఞానానామఫలసఫలప్రార్థనాకాతరాణాం .

సర్వావస్థాస్వఖిలవిషయాభ్యస్తకౌతూహలానాం

     త్వం నస్త్రాతా భవ పితృతయా భోగలోలార్భకాణాం .. 39..

యావద్దేహం జరయతి జరా నాంతకాదేత్య దూతీ

     నో వా భీమస్త్రిఫణభుజగాకారదుర్వారపాశః .

గాఢం కంఠే లగతి సహసా జీవితం లేలిహాన-

     స్తావద్భక్తాభయద సదయం శ్రేయసే నః ప్రసీద .. 40..

విశ్వప్రాణగ్రసనరసనాటోపకోపప్రగల్భం

     మృత్యోర్వక్త్రం దహననయనోద్దామదంష్ట్రాకరాలం .

యావదృష్ట్వా వ్రజతి న భియా పంచతామేష కాయ-

     స్తావన్నిత్యామృతమయ రవే పాహి నః కాందిశీకాన్ .. 41..

శబ్దాకారం వియదివ వపుస్తే యజుఃసామధామ్నః

     సప్తచ్ఛందాంస్యషి చ తురగా ఋఙ్మయం మండలం చ .

ఏవం సర్వశ్రుతిమయతయా మద్దయానుగ్రహాద్వా

     క్షిప్రం మత్తః కృపణకరుణాక్రందమాకర్ణయేమం .. 42..

నాశం నాస్మాచ్చరణశరణా యాంత్యపి గ్రస్యమానా

     దేవైరిత్థం సితమివ యశో దర్శయన్స్వం త్రిలోక్యాం .

మన్యే సోమం క్షతతనుమమాగర్భవృద్ధ్యా వివస్త్రన్

     శుక్లాం ఛాయాం నయసి శనకైః స్వాం సుషుమ్ణాంశుభాసా .. 43..

ఆస్తాం జన్మప్రభృతి భవతః సేవనం తద్ధి లోకే

     వాచ్యం కేనాపరిమితఫలం భుక్తిముక్తిప్రకారం .

జ్యోతిర్మాత్రం స్మృతిపథమితో జీవితాంతేఽపి భాస్వన్-

     నివీణాయ ప్రభవసి సతాం తేన తే కః సమోఽన్యః .. 44..

అప్రత్యక్షత్రిదశభజనాద్యత్పరోక్షం ఫలం తత్-

     పుసాం యుక్తం భవతి హి సమం కారణేనైవ కార్యం .

ప్రత్యక్షస్త్వం సకలజగతాం యత్సమక్షం ఫలం మే

     యుష్మద్భక్తేః ససుచితమతస్తత్తు యాచే యథా త్వాం .. 45..

యే చారోగ్యం దిశతి భగవాన్సేవితోఽప్యేవమాహు-

     స్తే తత్త్వజ్ఞా జగతి సుభగా భోగయోగప్రధానాః .

భుక్తేర్ముక్తేరపి చ జగతాం యచ్చ పూర్ణం సుఖానాం

     తస్యాన్యోఽర్కాదమృతవపుషః కో హి నామాస్తు దాతా .. 46..

హిత్వా హిత్వా గురుచపలతామప్యనేకాన్నిజార్థాన్-

     యైరేకార్థీకృతమివ భవత్సేవనం మత్ప్రియార్థం .

తేషామిచ్ఛామ్యుపకృతిమహం స్వేంద్రియాణాం ప్రియాణా-

     మాదౌ తస్మాన్మమ దినపతే దేహి తేభ్యః ప్రసాదం .. 47..

కిం తన్నామోచ్చరతి వచనం యస్య నోచ్చారకస్త్వం

     కిం తద్వాచ్యం సకలవచసాం విశ్వమూర్తే న యత్త్వం .

తస్మాదుక్తం యదపి తదపి త్వన్నుతౌ భక్తియోగా-

     దస్మాభిస్తద్భవతు భగవంస్త్వత్ప్రసాదేన ధన్యం .. 48..

యా పంథానం దిశతి శిశిరాద్యుత్తరం దేవయానం

     యా వా కృష్ణం పితృపథమథో దక్షిణం ప్రావృడాద్యం .

తాభ్యామన్యా విషువదభిజిన్మధ్యమా కృత్యశూన్యా

     ధన్యా కాశ్చిత్ప్రకృతిపురుషావంతరా మేఽస్తు వృత్తిః .. 49..

స్థిత్వా కించిన్మన ఇవ పిబన్సేతుబంధస్య మధ్యే

     ప్రాప్యోపేయం ష్ఠవపదమథో వ్యక్తముద్దాల్య తాలు .

సత్యాదూర్ధ్వం కిమపి పరమం వ్యోమ సోమాగ్నిశూన్యం

     గచ్ఛేయం త్వాం సురపితృగతీ చాంతరా బ్రహ్మభూతః .. 50..

సర్వాత్మత్వం సవితురితి యో వాఙ్మనఃకాయబుద్ధ్యా

     రాగద్వేషోపశమసమతాయోగమేవారురుక్షుః .

ధర్మాధర్మగ్రసనరశనాముక్తయే యుక్తియుక్తాం

     స శ్రీసాంబః స్తుతిమితి రవేః స్వప్రశాంతాం చకార .. 51..

భక్తిశ్రద్ధాద్యఖిలతరుణీవల్లభేనేదముక్తం

     శ్రీసాంబేన ప్రకటగహనం స్తోత్రమధ్యాత్మగర్భం .

యః సావిత్రం పఠతి నియతం స్వాత్మవత్సర్వలోకాన్-

     పశ్యన్సోఽన్తే వ్రజతి శుకవన్మండలం చండరశ్మేః .. 52..

ఇతి పరమరహస్యశ్లోకపంచాశదేషా

     తపననవనపుణ్యా సాగమబ్రహ్మచర్చా .

హరతు దురితమస్మద్వర్ణితాకర్ణితా వో

     దిశతు చ శుభసిద్ధిం మాతృవద్భక్తిభాజాం .. 53..

ఇతి సాంబప్రణీతా సాంబపంచాశికా సంపూర్ణా ..

శ్రీ అప్పయ్యదీక్షితవిరచితశ్రీమదాదిత్యస్తోత్రరత్నం

 శ్రీ అప్పయ్యదీక్షితవిరచితశ్రీమదాదిత్య

స్తోత్రరత్నం

----------------------------------

----------------------------------

అథ శ్రీమదప్పయ్యదీక్షితవిరచితం మహామహిమాన్వితం ఆదిత్యస్తోత్రం ..

విస్తారాయామమానం దశభిరుపగతో యోజనానాం సహస్రైః

చక్రే పంచారనాభిత్రితయవతి లసన్ నేమిషట్కే నివిష్టః .

సప్తచ్ఛందస్తురంగాహితవహనధురో హాయనాంశత్రివర్గ

వ్యక్తాకౢప్తాఖిలాంగః స్ఫురతు మమ పురః స్యందనశ్చండభానోః .. 1..

ఆదిత్యైరప్సరోభిర్మునిభిరహివరైర్గ్రామణీయాతుధానైః

గంధర్వైర్వాలఖిల్యైః పరివృతదశమాంశస్య కృత్స్నం రథస్య .

మధ్యం వ్యాప్యాధితిష్ఠన్ మణిరివ నభసో మండలశ్చండరశ్మేః

బ్రహ్మజ్యోతిర్వివర్తః శ్రుతినికరఘనీభావరూపః సమింధే .. 2..

నిర్గచ్ఛంతోఽర్కబింబాన్ నిఖిలజనిభృతాం హార్దనాడీప్రవిష్టాః

నాడ్యో వస్వాదిబృందారకగణమధునస్తస్య నానాదిగుత్థాః .

వర్షంతస్తోయముష్ణం తుహినమపి జలాన్యాపిబంతః సమంతాత్

పిత్రాదీనాం స్వధౌషధ్యమృతరసకృతో భాంతి కాంతిప్రరోహాః.. 3..

శ్రేష్ఠాస్తేషాం సహస్రే త్రిదివవసుధయోః పంచదిగ్వ్యాప్తిభాజాం

శుభ్రాంశుం తారకౌఘం శశితనయముఖాన్ పంచ చోద్భాసయంతః .

ఆరోగో భ్రాజముఖ్యాస్త్రిభువనదహనే సప్తసూర్యా భవంతః

సర్వాన్ వ్యాధీన్ సుషుమ్నాప్రభృతయ ఇహ మే సూర్యపాదాః క్షిపంతు .. 4..

ఆదిత్యానాశ్రితాః షణ్ణవతిగుణసహస్రాన్వితా రశ్మయోఽన్యే

మాసే మాసే విభక్తాస్త్రిభువనభవనం పావయంతః స్ఫురంతి .

యేషాం భువ్యప్రచారే జగదవనకృతాం సప్తరశ్మ్యుత్థితానాం

సంసర్పే చాధిమాసే వ్రతయజనముఖాః సత్క్రియాః న క్రియంతే .. 5..

ఆదిత్యం మండలాంతఃస్ఫురదరుణవపుస్తేజసా వ్యాప్తవిశ్వం

ప్రాతర్మధ్యాహ్నసాయం సమయవిభజనాదృగ్యజుస్సామసేవ్యం .

ప్రాప్యం చ ప్రాపకం చ ప్రథితమతిపథిజ్ఞానినాముత్తరస్మిన్

సాక్షాద్ బ్రహ్మేత్యుపాస్యం సకలభయహరాభ్యుద్గమం సంశ్రయామి .. 6..

యచ్ఛక్త్యాఽధిష్ఠితానాం తపనహిమజలోత్సర్జనాదిర్జగత్యాం

ఆదిత్యానామశేషః ప్రభవతి నియతః స్వస్వమాసాధికారః .

యత్ ప్రాధాన్యం వ్యనక్తి స్వయమపి భగవాన్ ద్వాదశస్తేషు భూత్వా

తం త్రైలోక్యస్య మూలం ప్రణమత పరమం దైవతం సప్తసప్తిం .. 7..

స్వఃస్త్రీగంధర్వయక్షా మునివరభుజగా యాతుధానాశ్చ నిత్యం

నృత్తైర్గీతైరభీశుగ్రహనుతివహనైరగ్రతః సేవయా చ .

యస్య ప్రీతిం వితన్వంత్యమితపరికరా ద్వాదశ ద్వాదశైతే

హృద్యాభిర్వాలఖిల్యాః సరణిభణితిభిస్తం భజే లోకబంధుం .. 8..

బ్రహ్మాండే యస్య జన్మోదితముషసి పరబ్రహ్మముఖ్యాత్మజస్య

ధ్యేయం రూపం శిరోదోశ్చరణపదజుషా వ్యాహృతీనాం త్రయేణ .

తత్ సత్యం బ్రహ్మ పశ్యామ్యహరహమభిధం నిత్యమాదిత్యరూపం

భూతానాం భూనభస్స్వః ప్రభృతిషు వసతాం ప్రాణసూక్ష్మాంశమేకం .. 9..

ఆదిత్యే లోకచక్షుష్యవహితమనసాం యోగినాం దృశ్యమంతః

స్వచ్ఛస్వర్ణాభమూర్తిం విదలితనలినోదారదృశ్యాక్షియుగ్మం .

ఋక్సామోద్గానగేష్ణం నిరతిశయలసల్లోకకామేశభావం

సర్వావద్యోదితత్వాదుదితసముదితం బ్రహ్మ శంభుం ప్రపద్యే .. 10..

ఓమిత్యుద్గీథభక్తేరవయవపదవీం ప్రాప్తవత్యక్షరేఽస్మిన్

యస్యోపాస్తిః సమస్తం దురితమపనయత్వర్కబింబే స్థితస్య .

యత్ పూజైకప్రధానాన్యఘమఖిలమపి ఘ్నంతి కృచ్ఛ్రవ్రతాని

ధ్యాతః సర్వోపతాపాన్ హరతు పరశివః సోఽయమాద్యో భిషఙ్నః .. 11..

ఆదిత్యే మండలార్చిః పురుషవిభిదయాద్యంతమధ్యాగమాత్మ-

న్యాగోపాలాంగనాభ్యో నయనపథజుషా జ్యోతిషా దీప్యమానం

గాయత్రీమంత్రసేవ్యం నిఖిలజనధియాం ప్రేరకం విశ్వరూపం .

నీలగ్రీవం త్రినే(ణే)త్రం శివమనిశముమావల్లభం సంశ్రయామి .. 12..

అభ్రాకల్పః శతాంగః స్థిరఫణితిమయం మండలం రశ్మిభేదాః

సాహస్రాస్తేషు సప్త శ్రుతిభిరభిహితాః కించిదూనాశ్చ లక్షాః .

ఏకైకేషాం చతస్రస్తదను దినమణేరాదిదేవస్య తిస్రః

కౢప్తాః తత్తత్ప్రభావప్రకటనమహితాః స్రగ్ధరా ద్వాదశైతాః .. 13..

దుఃస్వప్నం దుర్నిమిత్తం దురితమఖిలమప్యామయానప్యసాధ్యాన్

దోషాన్ దుఃస్థానసంస్థగ్రహగణజనితాన్ దుష్టభూతాన్ గ్రహాదీన్ .

నిర్ధూనోతి స్థిరాం చ శ్రియమిహ లభతే ముక్తిమభ్యేతి చాంతే

సంకీర్త్య స్తోత్రరత్నం సకృదపి మనుజః ప్రత్యహం పత్యురహ్నాం .. 14..

.. ఇతి శ్రీమదప్పయ్యదీక్షితవిరచితశ్రీమదాదిత్యస్తోత్రరత్నం ..

శ్రీభవిష్యపురాణే ఆదిత్యస్తోత్రం

-----------------------------------

-----------------------------------

నవగ్రహాణాం సర్వేషాం సూర్యాదీనాం పృథక్ పృథక్ .

పీడా చ దుఃసహా రాజంజాయతే సతతం నృణాం .. 1..

పీడానాశాయ రాజేంద్ర నామాని శృణు భాస్వతః .

సూర్యాదీనాం చ సర్వేషాం పీడా నశ్యతి శృణ్వతః .. 2..

ఆదిత్య సవితా సూర్యః పూషార్కః శీఘ్రగో రవిః .

భగస్త్వష్టాఽర్యమా హంసో హేలిస్తేజో నిధిర్హరిః .. 3..

దిననాథో దినకరః సప్తసప్తిః ప్రభాకరః .

విభావసుర్వేదకర్తా వేదాంగో వేదవాహనః .. 4..

హరిదశ్వః కాలవక్త్రః కర్మసాక్షీ జగత్పతిః .

పద్మినీబోధకో భానుర్భాస్కరః కరుణాకరః .. 5..

ద్వాదశాత్మా విశ్వకర్మా లోహితాంగస్తమోనుదః .

జగన్నాథోఽరవిందాక్షః కాలాత్మా కశ్యపాత్మజః .. 6..

భూతాశ్రయో గ్రహపతిః సర్వలోకనమస్కృతః .

జపాకుశుమ సంకాశో భాస్వానదితినందనః .. 7..

ధ్వాంతేభసింహః సర్వాత్మా లోకనేత్రో వికర్తనః .

మార్తండో మిహిరః సూరస్తపనో లోకతాపనః .. 8..

జగత్కర్తా జగత్సాక్షీ శనైశ్చరపితా జయః .

సహస్రరశ్మిస్తరణిర్భగవాన్భక్తవత్సలః .. 9..

వివస్వానాదిదేవశ్చ దేవదేవో దివాకరః .

ధన్వంతరిర్వ్యాధిహర్తా దద్రుకుష్ఠవినాశనః .. 10..

చరాచరాత్మా మైత్రేయోఽమితో విష్ణుర్వికర్తనః .

లోకశోకాపహర్తా చ కమలాకర ఆత్మభూః .. 11..

నారాయణో మహాదేవో రుద్రః పురుష ఈశ్వరః .

జీవాత్మా పరమాత్మా చ సూక్ష్మాత్మా సర్వతోముఖః .. 12..

ఇంద్రోఽనలో యమశ్చైవ నైరృతో వరుణోఽనిలః .

శ్రీద ఈశాన ఇందుశ్చ భౌమః సౌమ్యో గురుః కవిః .. 13..

శౌరిర్విధుంతుదః కేతుః కాలః కాలాత్మకో విభుః .

సర్వదేవమయో దేవః కృష్ణః కాయప్రదాయకః .. 14..

య ఏతైర్నామభిర్మర్త్యో భక్త్యా స్తౌతి దివాకరం .

సర్వపాపవినిర్ముక్తః సవర్రోగవివర్జితః .. 15..

పుత్రవాన్ ధనవాన్ శ్రీమాంజాయతే స న సంశయః .

రవివారే పఠేద్యస్తు నామాన్యేతాని భాస్వతః .. 16..

పీడాశాంతిర్భవేత్తస్య గ్రహాణాం చ విశేషతః .

సద్యః సుఖమవాప్నోతి చాయుర్దీర్ఘం చ నీరుజం .. 17..

ఇతి శ్రీభవిష్యపురాణే ఆదిత్యస్తోత్రం సంపూర్ణం .

శ్రీభవిష్యోత్తరపురాణే శ్రీకృష్ణార్జునసంవాదే శ్రీ ఆదిత్యహృదయ స్తోత్రం

శ్రీగణేశాయ నమః .

అథ ఆదిత్యహృదయం .

శతానీక ఉవాచ .

కథమాదిత్యముద్యంతముపతిష్ఠేద్విజోత్తమః .

ఏతన్మేబ్రూహి విప్రేంద్ర ప్రపద్యే శరణం తవ .. 1..

సుమంతురువాచ .

ఇదమేవ పురా పృష్టః శంఖచక్రగదాధరః .

ప్రణమ్య శిరసా దేవమర్జునేన మహాత్మనా .. 2..

కురుక్షేత్రే మహారాజప్రవృత్తే భారతే రణే .

కృష్ణనాథం సమాసాద్య ప్రార్థయిత్వాబ్రవీదిదం .. 3..

అర్జున ఉవాచ .

జ్ఞానం చ ధర్మశాస్త్రాణాం గుహ్యాద్గుహ్యతరం తథా .

మమ కృష్ణ పరిజ్ఞాతం వాఙ్మయం సచరాచరం .. 4..

సూర్యస్తుతిమయం న్యాసం వక్తుమర్హసి మాధవ .

భక్త్యా పృచ్ఛామి దేవేశ కథయస్వ ప్రసాదతః .. 5..

సూర్యభక్తిం కరిష్యామి కథం సూర్యం ప్రపూజయేత్ .

తదహం శ్రోతుమిచ్ఛామి త్వత్ప్రసాదేన యాదవ .. 6..

శ్రీభగవానువాచ .

రుద్రాదిదైవతైః సర్వైః పృష్టేన కథితం మయా .

వక్ష్యేఽహం సూర్యవిన్యాసం శృణు పాండవ యత్నతః .. 7..

అస్మాకం యత్త్వయా పృష్టమేకచిత్తో భవార్జున .

తదహం సంప్రవక్ష్యామి ఆదిమధ్యావసానకం .. 8..

అర్జున ఉవాచ .

నారాయణ సురశ్రేష్ఠ పృచ్ఛామి త్వాం మహాయశః .

కథమాదిత్యముద్యంతముపతిష్ఠేత్సనాతనం .. 9..

శ్రీభగవానువాచ .

సాధు పార్థ మహాబాహో బుద్ధిమానసి పాండవ .

యన్మాం పృచ్ఛస్యుపస్థానం తత్పవిత్రం విభావసోః .. 10..

సర్వమంగలమాంగల్యం సర్వపాపప్రణాశనం .

సర్వరోగప్రశమనమాయుర్వర్ధనముత్తమం .. 11..

అమిత్రదమనం పార్థ సంగ్రామే జయవర్ధనం .

వర్ధనం ధనపుత్రాణామాదిత్యహృదయం శృణు .. 12..

యచ్ఛ్రుత్వా సర్వపాపేభ్యో ముచ్యతే నాత్ర సంశయః .

త్రిషు లోకేషు విఖ్యాతం నిఃశ్రేయసకరం పరం .. 13..

దేవదేవం నమస్కృత్య ప్రాతరుత్థాయ చార్జున .

విఘ్నాన్యనేకరూపాణి నశ్యంతి స్మరణాదపి .. 14..

తస్మాత్సర్వప్రయత్నేన సూర్యమావాహయేత్ సదా .

ఆదిత్యహృదయం నిత్యం జాప్యం తచ్ఛృణు పాండవ .. 15..

యజ్జపాన్ముచ్యతే జంతుర్దారిద్ర్యాదాశు దుస్తరాత్ .

లభతే చ మహాసిద్ధిం కుష్ఠవ్యాధివినాశినీం .. 16..

అస్మిన్మంత్రే ఋషిశ్ఛందో దేవతాశక్తిరేవ చ .

సర్వమేవ మహాబాహో కథయామి తవాగ్రతః .. 17..

మయా తే గోపితం న్యాసం సర్వశాస్త్రప్రబోధితం .

అథ తే కథయిష్యామి ఉత్తమం మంత్రమేవ చ .. 18..

ఓం అస్య శ్రీఆదిత్యహృదయస్తోత్రమంత్రస్య శ్రీకృష్ణ ఋషిః .

శ్రీసూర్యాత్మా త్రిభువనేశ్వరో దేవతా అనుష్టుప్ఛందః .

హరితహయరథం దివాకరం ఘృణిరితి బీజం .

ఓం నమో భగవతే జితవైశ్వానరజాతవేదసే ఇతి శక్తిః .

ఓం నమో భగవతే ఆదిత్యాయ నమః ఇతి కీలకం .

ఓం అగ్నిగర్భదేవతా ఇతి మంత్రః .

ఓం నమో భగవతే తుభ్యమాదిత్యాయ నమోనమః .

శ్రీసూర్యనారాయణప్రీప్యథం జపే వినియోగః .

అథ న్యాసః .

ఓం హ్రాం అంగుష్ఠాభ్యాం నమః .

ఓం హ్రీం తర్జనీభ్యాం నమః .

ఓం హ్రూం మధ్యమాభ్యాం నమః .

ఓం హ్రైం అనామికాభ్యాం నమః .

ఓం హ్రౌం కనిష్ఠికాభ్యాం నమః .

ఓం హ్రః కరతలకరపృష్ఠాభ్యాం నమః .

ఓం హ్రాం హృదయాయ నమః .

ఓం హ్రీం శిరసే స్వాహా .

ఓం హ్రూం శిఖాయ వషట్ .

ఓం హ్రైం కవచాయ హుం

ఓం హ్రౌం నేత్రత్రయాయ వౌషట్ .

ఓం హ్రః అస్త్రాయ ఫట్ .

ఓం హ్రాం హ్రీం హ్రూం హ్రైం హ్రౌం హ్రః ఇతి దిగ్బంధః ..

అథ ధ్యానం ..

భాస్వద్రత్నాఢ్యమౌలిః స్ఫురదధరరుచా రంజితశ్చారుకేశో

    భాస్వాన్యో దివ్యతేజాః కరకమలయుతః స్వర్ణవర్ణః ప్రభాభిః .

విశ్వాకాశావకాశగ్రహపతిశిఖరే భాతి యశ్చోదయాద్రౌ

    సర్వానందప్రదాతా హరిహరనమితః పాతు మాం విశ్వచక్షుః .. 1..

పూర్వమష్టదలం పద్మం ప్రణవాదిప్రతిష్ఠితం .

మాయాబీజం దలాష్టాగ్రే యంత్రముద్ధారయేదితి .. 2..

ఆదిత్యం భాస్కరం భానుం రవిం సూర్యం దివాకరం .

మార్తండం తపనం చేతి దలేష్వష్టసు యోజయేత్ .. 3..

దీప్తా సూక్ష్మా జయా భద్రా విభూతిర్విమలా తథా .

అమోఘా విద్యుతా చేతి మధ్యే శ్రీః సర్వతో ముఖీ .. 4..

సర్వజ్ఞః సర్వగశ్చైవ సర్వకారణదేవతా .

సర్వేశం సర్వహృదయం నమామి సర్వసాక్షిణం .. 5..

సర్వాత్మా సర్వకర్తా చ సృష్టిజీవనపాలకః .

హితః స్వర్గాపవర్గశ్చ భాస్కరేశ నమోఽస్తు తే .. 6..

ఇతి ప్రార్థనా ..

నమో నమస్తేఽస్తు సదా విభావసో సర్వాత్మనే సప్తహయాయ భానవే .

అనంతశక్తిర్మణిభూషణేన దదస్వ భుక్తిం మమ ముక్తిమవ్యయాం .. 7..

అర్కం తు మూర్ధ్ని విన్యస్య లలాటే తు రవిం న్యసేత్ .

విన్యసేన్నేత్రయోః సూర్యం కర్ణయోశ్చ దివాకరం .. 8..

నాసికాయాం న్యసేద్భానుం ముఖే వై భాస్కరం న్యసేత్ .

పర్జన్యమోష్ఠయోశ్చైవ తీక్ష్ణం జిహ్వాంతరే న్యసేత్ .. 9..

సువర్ణరేతసం కంఠే స్కంధయోనితగ్మతేజసం .

బాహ్వోస్తు పూషణం చైవ మిత్రం వై పృష్ఠతో న్యసేత్ .. 10..

వరుణం దక్షిణే హస్తే త్వష్టారం వామతః కరే .

హస్తావుష్ణకరః పాతు హృదయం పాతు భానుమాన్ .. 11..

ఉదరే తు యమం విద్యాదాదిత్యం నాభిమండలే .

కట్యాం తు విన్యసేద్ధంసం రుద్రమూర్వోస్తు విన్యసేత్ .. 12..

జాన్వోస్తు గోపతిం న్యస్య సవితారం జంఘయోః .

పాదయోశ్చ వివస్వంతం గుల్ఫయోశ్చ దివాకరం .. 13..

బాహ్యతస్తు తమోధ్వంస భగమభ్యంతరే న్యసేత్ .

సర్వాంగేషు సహస్రాంశుం దిగ్విదిక్షు భగ న్యసేత్ .. 14..

ఇతి దిగ్బంధః .

ఏష ఆదిత్యవిన్యాసో దేవానామపిదుర్లభః .

ఇమం భక్త్యా న్యసేత్పార్థ స యాతి పరమాం గతిం .. 15..

కామక్రోధకృతాత్పాపాన్ముచ్యతే నాత్ర సంశయః .

సర్పాదపి భయం నైవ సంగ్రామేషు పథిష్వపి .. 16..

రిపుసంఘట్టకాలేషు తథా చోరసమాగమే .

త్రిసంధ్యం జపతో న్యాస మహాపాతకనాశనం .. 17..

విస్ఫోటకసముత్పన్న తీవ్రజ్వరసభుద్భవం .

శిరోరోగం నేత్రరోగం సర్వవ్యాధివినాశనం .. 18..

కుష్ఠవ్యాధిస్తథా దద్రురోగాశ్చ వివిధాశ్చ యే .

జపమానస్య నశ్యంతి శృణు భక్త్యా తదర్జున .. 19..

ఆదిత్యో మంత్రసంయుక్త ఆదిత్యో భువనేశ్వరః .

ఆదిత్యాన్నాపరో దేవో హ్యాదిత్యః పరమేశ్వరః .. 20..

ఆదిత్యమర్చయేద్బ్రహ్మా శివ ఆదిత్యమర్చయేత్ .

యదాదిత్యమయం తేజో మమ తేజత్తదర్జున .. 21..

ఆదిత్యం మంత్రసంయుక్తమాదిత్యం భువనేశ్వరం .

ఆదిత్యం యే ప్రపశ్యంతి మాం పశ్యంతి న సంశయః .. 22..

త్రిసంధ్యమర్చయేత్సూర్యం స్మరేద్భక్త్యా తు యో నరః .

న స పశ్యతి దారిద్ర్యం జన్మజన్మని చార్జున .. 23..

ఏతత్తే కథితం పార్థ ఆదిత్యహృదయం మయా .

శృణవన్ముక్తశ్చ పాపేభ్యః సూర్యలోకే మహీయతే .. 24..

నమో భగవతే తుభ్యమాదిత్యాయ నమో నమః .

ఆదిత్యః సవితా సూర్యః ఖగః పూషా గభస్తిమాన్ .. 25..

సువర్ణః స్ఫటికో భానుః స్ఫురితో విశ్వతాపనః .

రవిర్విశ్వో మహాతేజాః సువర్ణః సుప్రబోధకః .. 26..

హిరణ్యగర్భస్త్రిశిరాస్తపనో భాస్కరో రవిః .

మార్తండో గోపతిః శ్రీమాన్ కృతజ్ఞశ్చ ప్రతాపవాన్ .. 27..

తమిస్రహా భగో హంసో నాసత్యశ్చ తమోనుదః .

శుద్ధో విరోచనః కేశీ సహస్రాంశుర్మహాప్రభుః .. 28..

వివస్వాన్పూషణో మృత్యుర్మిహిరో జామదగ్న్యజిత్ .

ధర్మరశ్మిఃపతంగశ్చ శరణ్యో మిత్రహా తపః .. 29..

దుర్విజ్ఞేయగతిః శూరస్తేజోరశ్మిర్మహాయశాః .

శంభుశ్చిత్రాంగదః సౌమ్యో హవ్యకవ్యప్రదాయకః .. 30..

అంశుమానుత్తమో దేవ ఋగ్యజుఃసామ ఏవ చ .

హరిదశ్వస్తమోదారః సప్తసప్తిర్మరీచిమాన్ .. 31..

అగ్నిగర్భోఽద్రితేః పుత్రః శంభుస్తిమిరనాశనః .

పూషా విశ్వంభరో మిత్రః సువర్ణః సుప్రతాపవాన్ .. 32..

ఆతపీ మండలీ భాస్వాంస్తపనః సర్వతాపనః .

కృతవిశ్వో మహాతేజః సర్వరత్నమయోద్భవః .. 33..

అక్షరశ్చ క్షరశ్చైవ ప్రభాకరవిభాకరౌ .

చంద్రశ్చంద్రాంగదః సౌమ్యో హవ్యకవ్యప్రదాయకః .. 34..

అంగారకో గదోఽగస్తీ రక్తాంగశ్చాంగవర్ధనః .

బుధో బుద్ధాసనో బుద్ధిర్బుద్ధాత్మబుద్ధివర్ధనః .. 35..

బృహద్భానుర్బృహద్భాసో బృహద్ధామా బృహస్పతిః .

శుక్లస్త్వం శుక్లరేతాస్త్వం శుక్లాంగః శుక్లభూషణః .. 36..

శనిమాన్ శనిరూపస్త్వం శనైర్గచ్ఛసి సర్వదా .

అనాదిరాదిరాదిత్యస్తేజోరాశిర్మహాతపాః .. 37..

అనాదిరాదిరూపస్త్వమాదిత్యో దిక్పతిర్యమః .

భానుమాన్ భానురూపస్త్వం స్వర్భానుర్భానుదీతిమాన్ .. 38..

ధూమ్రకేతుర్మహాకేతుః సర్వకేతురనుత్తమః .

తిమిరావరణః శంభుః స్త్రష్టా మార్తండఏవ చ .. 39..

నమః పూర్వాయ గిరయే పశ్చిమాయ నమో నమః .

నమోత్తరాయ గిరయే దక్షిణాయ నమో నమః .. 40..

నమో నమః సహస్రాంశో హ్యాదిత్యాయ నమో నమః .

నమఃపద్మప్రబోధాయ నమస్తే ద్వాదశాత్మనే .. 41..

నమో విశ్వప్రబోధాయ నమో భ్రాజిష్ణుజిష్ణవే .

జ్యోతిషే చ నమస్తుభ్యం జ్ఞానాకార్య నమో నమః .. 42..

ప్రదీప్తాయ ప్రగల్భాయ యుగాంతాయ నమో నమః .

నమస్తే హోతృపతయే పృథివీపతయే నమః .. 43..

నమోంకార వషట్కార సర్వయజ్ఞ నమోఽస్తు తే .

ఋగ్వేదాయ యజుర్వేద సామవేద నమోఽస్తు తే .. 44..

నమో హాటకవర్ణాయ భాస్కరాయ నమో నమః .

జయాయ జయభద్రాయ హరిదశ్వాయ తే నమః .. 45..

దివ్యాయ దివ్యరూపాయ గ్రహాణాం పతయే నమః .

నమస్తే శుచయే నిత్యం నమః కురుకులాత్మనం .. 46..

నమస్త్రైలోక్యనాథాయ భూతానాం పతయే నమః .

నమః కైవల్యనాథాయ నమస్తే దివ్యచక్షుషే .. 47..

త్వం జ్యోతిస్త్వం ద్యుతిర్బ్రహ్మా త్వం విష్ణుస్త్వం ప్రజాపతిః .

త్వమేవ రుద్రో రుద్రాత్మా వాయురగ్నిస్త్వమేవ చ .. 48..

యోజనానాం సహస్రే ద్వే శతే ద్వే ద్వే చ యోజనే .

ఏకేన నిమిషార్ధేన క్రమమాణ నమోఽస్తు తే .. 49..

నవయోజనలక్షాణి సహస్రద్విశతాని చ .

యావద్ధటీప్రమాణేన క్రమమాణ నమోఽస్తు తే .. 50..

అగ్రతశ్చ నమస్తుభ్యం పృష్ఠతశ్చ సదా నమః .

పార్శ్వతశ్చ నమస్తుభ్యం నమస్తే చాస్తు సర్వదా .. 51..

నమః సురారిహంత్రే చ సోమసూర్యాగ్నిచక్షుషే .

నమో దివ్యాయ వ్యోమాయ సర్వతంత్రమయాయ చ .. 52..

నమో వేదాంతవైద్యాయ సర్వకర్మాదిసాక్షిణే .

నమో హరితవర్ణాయ సువర్ణాయ నమో నమః .. 53..

అరుణో మాఘమాసే తు సూర్యో వై ఫాల్గునే తథా .

చైత్రమాసే తు వేదాంగో భానుర్వైశాఖతాపనః .. 54..

జ్యేష్ఠమాసే తపేదింద్ర ఆషాఢే తపతే రవిః .

గభస్తిః శ్రావణే మాసి యమో భాద్రపదే తథా .. 55..

ఇషే సువర్ణరేతాశ్చ కార్తికే చ దివాకరః .

మార్గశీర్షే తపేన్మిత్రః పౌషే విష్ణుః సనాతనః .. 56..

పురుషస్త్వధికే మాసి మాసాధిక్యే తు కల్పయేత్ .

ఇత్యేతే ద్వాదశాదిత్యాః కాశ్యపేయాః ప్రకీర్తితాః .. 57..

ఉగ్రరూపా మహాత్మానస్తపంతే విశ్వరూపిణః .

ధర్మార్థకామమోక్షాణాం ప్రస్ఫుటా హేతవో నృప .. 58..

సర్వపాపహరం చైవమాదిత్యం సంప్రపూజయేత్ .

ఏకధా దశధా చైవ శతధా చ సహస్రధా .. 59..

తపంతే విశ్వరూపేణ సృజంతి సంహరంతి చ .

ఏష విష్ణుః శివశ్చైవ బ్రహ్మా చైవ ప్రజాపతిః .. 60..

మహేంద్రశ్చైవ కాలశ్చ యమో వరుణ ఏవ చ .

నక్షత్రగ్రహతారాణామధిపో విశ్వతాపనః .. 61..

వాయురగ్నిర్ధనాధ్యక్షో భూతకర్తా స్వయం ప్రభుః .

ఏష దేవో హి దేవానాం సర్వమాప్యాయతే జగత్ .. 62..

ఏష కర్తా హి భూతానాం సంహర్తా రక్షకస్తథా .

ఏష లోకానులోకాశ్చ సప్తద్వీపాశ్చ సాగరాః .. 63..

ఏష పాతాలసప్తస్థా దైత్యదానవరాక్షసాః .

ఏష ధాతా విధాతా చ బీజం క్షేత్రం ప్రజాపతిః .. 64..

ఏష ఏవ ప్రజా నిత్యం సంవర్ధయతి రశ్మిభిః .

ఏష యజ్ఞః స్వధా స్వహా హ్రీః శ్రీశ్చ పురుషోత్తమః .. 65..

ఏష భూతాత్మకో దేవః సూక్ష్మోఽవ్యక్తః సనాతనః .

ఈశ్వరః సర్వభూతానాం పరమేష్ఠీ ప్రజాపతిః .. 66..

కాలాత్మా సర్వభూతాత్మా వేదాత్మా విశ్వతోముఖః .

జన్మమృత్యుజరావ్యాధిసంసారభయనాశనః .. 67..

దారిద్ర్యవ్యసనధ్వంసీ శ్రీమాందేవో దివాకరః .

కీర్తనీయో వివస్వాంశ్చ మార్తండో భాస్కరో రవిః .. 68..

లోకప్రకాశకః శ్రీమాఀల్లోకచక్షుర్గ్రహేశ్వరః .

లోకసాక్షీ త్రిలోకేశః కర్తా హర్తా తమిస్రహా .. 69..

తపనస్తాపనశ్చైవ శుచిః సప్తాశ్వవాహనః .

గభస్తిహస్తో బ్రహ్మణ్యః సర్వదేవనమస్కృతః .. 70..

ఆయురారోగ్యమైశ్వర్యం నరా నార్యశ్చ మందిరే .

యస్య ప్రసాదాత్సంతుష్టిరాదిత్యహృదయం జపేత్ .. 71..

ఇత్యేనైర్నామభిః పార్థ ఆదిత్యం స్తౌతి నిత్యశః .

ప్రాతరుత్థాయ కౌంతేయ తస్య రోగభయం నహి .. 72..

పాతకాన్ముచ్యతే పార్థ వ్యాధిభ్యశ్చ న సంశయః .

ఏకసంధ్యం ద్విసంధ్యం వా సర్వపాపైః ప్రముచ్యతే .. 73..

త్రిసంధ్యం జపమానస్తు పశ్యేశ్చ పరమం పదం .

యదహ్నాత్కురుతే పాపం తదహ్నాత్ప్రతిముచ్యతే .. 74..

యద్రాత్ర్యాత్కురుతే పాపం తద్రాత్ర్యాత్ప్రతిముచ్యతే .

దద్రుస్ఫోటకకుష్ఠాని మండలాని విషూచికా .. 75..

సర్వవ్యాధిమహారోగభూతబాధాస్తథైవ చ .

డాకినీ శాకినీ చైవ మహారోగభయం కుతః .. 76..

యే చాన్యే దుష్టగేగాశ్చ జ్వరాతీసారకాదయః .

జపమానస్య నశ్యంతి జీవేచ్చ శరదాం శతం .. 77..

సంవత్సరేణ మరణం యదా తస్య ధ్రువం భవేత్ .

అశీర్షాం పశ్యతిచ్ఛాయామహోరాత్రం ధనంజయ .. 78..

యస్త్విదం పఠతే భక్త్యా భానోర్వారే మహాత్మనః .

ప్రాతఃస్నానే కృతే పార్థ ఏకాగ్రకృతమానసః .. 79..

సువర్ణచక్షుర్భవతి న చాంధస్తు ప్రజాయతే .

పుత్రవాన్ ధనసంపన్నో జాయతే చారుజః సుఖీ .. 80..

సర్వసిద్ధిమవాప్నోతి సర్వత్ర విజయీ భవేత .

ఆదిత్యహృదయం పుణ్యం సూర్యనామవిభూషితం .. 81..

శ్రుత్వా చ నిఖిలం పార్థ సర్వపాపైః ప్రముచ్యతే .

అతః పరతరం నాస్తి సిద్ధికామస్య పాండవ .. 82..

ఏతజ్జపస్వ కౌంతేయ యేన శ్రేయో హ్యవాప్స్యసి .

ఆదిత్యహృదయం నిత్యం యః పఠేత్సుసమాహితః .. 83..

భ్రూణహా ముచ్యతే పాపాత్కృతఘ్నో బ్రహ్మఘాతకః .

గోఘ్నః సురాపో దుర్భోజీ దుష్ప్రతిగ్రహకారకః .. 84..

పాతకాని చ సర్వాణి దహత్యేవ న సంశయః .

య ఇదం శృణుయాన్నిత్య జపేద్వాఽపి సమాహితః .. 85..

సర్వపాపవిశుద్ధాత్మా సూర్యలోకే మహీయతే .

అపుత్రో లభతే పుత్రాన్నిర్ధనో ధనమాప్నుయాత్ .. 86..

కురోగీ ముచ్యతే రోగాద్భక్త్యా యః పఠతే సదా .

యస్త్వాదిత్యదినే పార్థ నాభిమాత్రజలే స్థితః .. 87..

ఉదయాచలమారూఢం భాస్కరం ప్రణతః స్థితః .

జపతే మానవో భక్త్యా శృణుయాద్వాపి భక్తితః .. 88..

స యాతి పరమం స్థానం యత్ర దేవో దివాకరః .

అమిత్రదమనం పార్థ యదా కర్తుం సమారభేత్ .. 89..

తదా ప్రతికృతిం కృత్వా శత్రోశ్చరణపాంసుభిః .

ఆక్రమ్య వామపాదేన హ్యాదిత్యహృదయం జపేత్ .. 90..

ఏతన్మంత్రం సమాహూయ సర్వసిద్ధికరం పరం .

ఓం హ్రీం హిమాలీఢం స్వాహా . ఓం హ్రీం నిలీఢం స్వాహా .

ఓం హ్రీం మాలీఢం స్వాహా . ఇతి మంత్రః .

త్రిభిశ్చ రోగీ భవతి జ్వరీ భవతి పంచభిః .

జపైస్తు సప్తభిః పార్థ రాక్షసీం తనుమావిశేత .. 91..

రాక్షససేనాభిభూతస్య వికారాన్ శృణు పాండవ .

గీయతే నృత్యతే నగ్న ఆస్ఫోటయతి ధావతి .. 92..

శివారుతం చ కురుతే హసతే క్రందతే పునః .

ఏవం సంపీడ్యతే పార్థ యద్యపి స్యాన్మహేశ్వరః .. 93..

కిం పునర్మానుషః కశ్చిచ్ఛౌచాచారవివర్జితః .

పీడితస్య న సందేహో జ్వరౌ భవతి దారుణః .. 94..

యదా చానుగ్రహం తస్య కర్తుమిచ్ఛేచ్ఛుభంకరం .

తదా సలిలమాదాయ జపేన్మంత్రమిమం బుధః .. 95..

నమో భగవతే తుభ్యమాదిత్యాయ నమో నమః .

జయాయ జయభద్రాయ హరిదశ్వాయ తే నమః .. 96..

స్నాపయేత్తేన మంత్రేణ శుభం భవతి నాన్యథా .

అన్యథా చ భవేద్దోషో నశ్యతే నాత్ర సంశయః .. 97..

అతస్తే నిఖిలః ప్రోక్తః పూజాం చైవ నిబోధ మే .

ఉపలిప్తే శుచౌ దేశే నియతో వాగ్యతాః శుచిః .. 98..

వృత్తం వా చతురస్రం వా లిప్తభూమౌ లిఖేచ్ఛచి .

త్రిధా తత్ర లిఖేత్పద్మమష్టపత్రం సకర్ణికం .. 99..

అష్టపత్రంలిఖేత్పద్మం లిప్తగోమయమండలే .

పూర్వపత్రే లిఖేత్ సూర్యమాగ్నేయ్యాం తు రవిం న్యసేత్ .. 100..

యామ్యాయాం చ వివస్వంతం నైఋర్త్యాం తు భగం న్యసేత్ .

ప్రతీచ్యాం వరుణం విద్యాద్వాయవ్యాం మిత్రమేవ చ .. 101..

ఆదిత్యముత్తరే పత్రే ఈశాన్యాం మిత్రమేవ చ .

మధ్యే తు భాస్కరం విద్యాత్క్రమేణైవం సమర్చయేత్ .. 102..

అతః పరతరం నాస్తి సిద్ధికామస్య పాండవ .

మహాతేజః సముద్యతం ప్రణమేత్స కృతాంజలిః .. 103..

సకేసరాణి పద్మాని కరవీరాణి చార్జున .

తిలతణ్ద్గులయుక్తాని కుశగంధోదకాని చ .. 104..

రక్తచందనమిశ్రాణి కృత్వా వై తామ్రభాజనే .

ధృత్వా శిరసి తత్పాత్రం జానుభ్యాం ధరణీం స్పృశేత్ .. 105..

మంత్రపూతం గుడాకేశః చార్ఘ్యం దద్యాద్గభస్తయే .

సాయుధం సరథం చైవ సూర్యమావాహయామ్యహం .. 106..

స్వాగతో భవ .

సుప్రతిష్ఠితో భవ .

సన్నిధౌ భవ .

సన్నిహితో భవ .

సమ్ముఖో భవ .

ఇతి పంచముద్రాః .

స్ఫుటయిత్వాఽర్హయేత్సూర్యం భుక్తి ముక్తిం లభేన్నరః .. 107..

ఓం శ్రీం విద్యా కిలికిలికటకేష్టసర్వార్థసాధనాయ స్వాహా .

ఓం శ్రీం హ్రీం హ్రూం హంసః సూర్యాయ నమః స్వాహా .

ఓం శ్రీం హ్రాం హ్రీం హ్రూం హ్రః సూర్యమూర్తయే స్వాహా .

ఓం శ్రీం హ్రీం ఖం ఖః లోకాయ సూర్యమూర్తయే స్వాహా .

ఓం హ్రూం మార్తండాయ స్వాహా .

నమోఽస్తు సూర్యాయ సహస్రభానవే నమోఽస్తు వైశ్వానరజాతవేదసే .

త్వమేవ చార్ఘ్యం ప్రతిగృహ్ణ దేవ దేవాధిదేవాయ నమో నమస్తే .. 108..

నమో భగవతే తుభ్యం నమస్తే జాతవేదసే .

దత్తమర్ఘ్యం మయా భానో త్వం గృహాణ నమోఽస్తు తే .. 109..

ఏహి సూర్య సహస్రాంశో తేజోరాశే జగత్పతే .

అనుకంపయ మాం దేవ గృహాణార్ఘ్యం నమోఽస్తుతే .. 110..

నమో భగవతే తుభ్యం నమస్తే జాతవేదసే .

మమేదమర్ఘ్యం గృహ్ణ త్వం దేవదేవ నమోఽస్తు తే .. 111..

సర్వదేవాధిదేవాయ ఆధివ్యాధివినాశినే .

ఇదం గృహాణ మే దేవ సర్వవ్యాధిర్వినశ్యతు .. 112..

నమః సూర్యాయ శాంతాయ సర్వరోగవినాశినే .

మమేప్సితం ఫలం దత్త్వా ప్రసీద పరమేశ్వర .. 113..

ఓం నమో భగవతే సూర్యాయ స్వాహా . ఓం శివాయ స్వాహా .

ఓం సర్వాత్మనే సూర్యాయనమః స్వాహా . ఓం అక్షయ్యతేజసేనమః స్వాహా .

సర్వసంకటదారిద్రయం శత్రుం నాశయ నాశయ .

సర్వలోకేషు విశ్వాత్మన్సర్వాత్మన్సర్వదర్శక .. 114..

నమో భగవతే సూర్య కుష్ఠరోగాన్విఖండయ .

ఆయురారోగ్యమైశ్వర్యం దేహి దేవ నమోఽస్తు తే .. 115..

నమో భగవతే తుభ్యమాదిత్యాయ నమో నమః .

ఓం అక్షయ్యతేజసే నమః .

ఓం సూర్యాయ నమః .

ఓం విశ్వమూర్తయే నమః .

ఆదిత్యం చ శివం విద్యాచ్ఛివమాదిత్యరూపిణం .

ఉభయోరంతరం నాస్తి ఆదిత్యస్య శివస్య చ .. 116..

ఏతదిచ్ఛామ్యహం శ్రోతుం పురూషో వై దివాకరః .

ఉదయే బ్రాహ్మణో రూపం మధ్యాహ్నే తు మహేశ్వరః .. 117..

అస్తమానే స్వయం విష్ణుస్త్రిమూర్తిశ్చ దివాకరః .

నమో భగవతే తుభ్యం విష్ణవే ప్రభవిష్ణవే .. 118..

మమేదమర్ఘ్యం ప్రతిగృహ్ణ దేవ దేవాధిదేవాయ నమో నమస్తే .

శ్రీసూర్యనారాయణాయ సాంగాయ సపరివారాయ ఇదమర్ఘ్యం సమర్పయామి .. 119..

హిమఘ్నాయ తమోఘ్నాయ రక్షోఘ్నాయ చ తే నమః .

కృతఘ్నాయ సత్యాయ తస్మై సూయార్త్మనే నమః .. 120..

జయోఽజయశ్చ విజయో జితప్రాణో జితశ్రమః .

మనోజవో జితక్రోధో వాజినః సప్త కీర్తితాః .. 121..

హరితహయరథం దివాకరం కనకమయాంబుజరేణుపింజరం .

ప్రతిదినముదయే నవం శరణముపైమి హిరణ్యరేతసం .. 122..

న తం వ్యాలాః ప్రబాధంతే న వ్యాధిభ్యోభయం భవేత్ .

న నాగేభ్యో భయం చైవ నచ భూతభయం క్వచిత్ .. 123..

అగ్నిశత్రుభయం నాస్తి పార్థివేభ్యస్తథైవ చ .

దుర్గతిం తరతే ఘోరాం ప్రజాం చ లభతే పశూన్ .. 124..

సిద్ధికామో లభేత్సిద్ధిం కన్యాకామస్తు కన్యకాం .

ఏతత్పఠేత్స కౌంతేయ భక్తియుక్తేన చేతసా .. 125..

అశ్వమేధసహస్రస్య వాజపేయశతస్య చ .

కన్యాకోటిసహస్రస్య దత్తస్య ఫలమాప్నుయాత్ .. 126..

ఇదమాదిత్యహృదయం యోఽధీతే సతనం నరః .

సర్వపాపవిశుద్ధాత్మా సూర్యలోకే మహీయతే .. 127..

నాస్త్యాదిత్యసమో దేవో నాస్త్యాదిత్యసమా గతిః .

ప్రత్యక్షో భగవన్విష్ణుర్యేన విశ్వం ప్రతిష్ఠితం .. 128..

నవతిర్యోజనం లక్షం సహస్రాణి శతాని చ .

యావద్ఘటీప్రమాణేన తావచ్చరతి భాస్కరః .. 129..

గవాం శతసహస్రస్య సమ్యగ్దత్తస్య యత్ఫలం .

తత్ఫలం లభతే విద్వాఞ్శాంతాత్మా స్తౌతి యో రవిం .. 130..

యోఽధీతే సూర్యహృదయం సకలం సఫలం భవేత్ .

అష్టానాం బ్రాహ్మణానాం చ లేఖయిత్వా సమర్పయేత్ .. 131..

బ్రహ్మలోకే ఋషీణాం చ జాయతే మానుషోఽపి వా .

జాతిస్మరత్వమాప్నోతి శుద్ధాత్మా నాత్ర సంశయః .. 132..

అజాయ లోకత్రయపావనాయ భూతాత్మనే గోపతయే వృషాయ .

సూర్యాయ సర్వప్రలయాంతకాయ నమో మహాకారుణికోత్తమాయ .. 133..

వివస్వతే జ్ఞానమృదంతరాత్మనే జగత్ప్రదీపాయ గజద్ధితైషిణే .

స్వయంభువే దీప్తసహస్రచక్షుషే సురోత్తమాయామితతేజసే నమః .. 134..

సురైరనేకైః పరిషేవితాయ హిరణ్యగర్భాయ హిరణ్మయాయ .

మహాత్మనే మోక్షపదాయ నిత్యం నమోఽస్తు తే వాసరకారణాయ .. 135..

ఆదిత్యశ్చార్చితో దేవ ఆదిత్యః పరమం పదం .

ఆదిత్యో మాతృకో భూత్వా ఆదిత్యో వాఙ్మయ జగత్ .. 136..

ఆదిత్యం పశ్యతే భక్త్యా మాం పశ్యతి ధ్రువం నరః .

నాదిత్యం పశ్యతే భక్త్యా న స పశ్యతి మాం నరః .. 137..

త్రిగుణం చ త్రితత్త్వం చ త్రయో దేవాస్త్రయోఽగ్నయః .

త్రయాణాం చ త్రిమూర్తిస్త్వం తురీయస్త్వం నమోఽస్తు తే .. 138..

నమః సవిత్రే జగదేక చక్షుషే జగత్ప్రసూతిస్థితినాశహేతవే .

త్రయీమథాయ త్రిగుణాత్మధారిణే విరించినారాయణశంకరాత్మనే .. 139..

యస్యోదయేనేహ జగత్ప్రబుద్ధ్యతే ప్రవర్తతే చాఖిలకర్మసిద్ధయే .

బ్రహ్మేంద్రనారాయణరుద్రవందితః స నః సదా యచ్ఛతు మంగలం రవిః .. 140..

నమోఽస్తు సూర్యాయ సహస్రరశ్మయే సహస్రశాఖాన్వితసంభవాత్మనే .

సహస్రయోగోద్భవభావభాగినే సహస్రసంఖ్యాయుగధారిణే నమః .. 141..

యత్మండలం దీతికరం విశాలం రత్నప్రభం తీవ్రమనాదిరూపం .

దారిద్ర్యదుఃఖక్షయకారణం చ పునాతు మాం తత్సవితుర్వరేణ్యం .. 142..

యన్మండలం దేవగణైః సుపూజితం విప్రైః స్తుతంభావనముక్తికోవిదం .

తం దేవదేవం ప్రణమామి సూర్యం పునాతు మాం తత్సవితుర్వరేణ్యం .. 143..

యన్మండలం జ్ఞానఘనం త్వగమ్యం త్రైలోక్యపూజ్యం త్రిగుణాత్మరూపం .

సమస్తతేజోమయదివ్యరూపం పునాతు మాం తత్సవితుర్వరేణ్యం .. 144..

యన్మండలం గూఢమతిప్రబోధం ధర్మస్య వృద్ధిం కురుతే జనానాం .

యత్సర్వపాపక్షయకారణం చ పునాతు మాం తత్సవితుర్వరేణ్యం .. 145..

యన్మండలం వ్యాధి వినాశదక్షం యదృగ్యజుః సామసు సంప్రగీతం .

ప్రకాశితం యేన చ  భూర్భువఃస్వః పునాతు మాం తత్సవితువరేణ్యం .. 146..

యన్మండలం వేదవిదో వదంతి గాయంతి యచ్చారణ సిద్ధసంఘాః .

యద్యోగినో యోగజుషాం చ సంఘాః పునాతు మాం తత్సవితుర్వరేణ్యం .. 147..

యన్మండలం సర్వజనేషు పూజితం జ్యోతిశ్చ కుర్యాదిహ మర్త్యలోకే .

యత్కాలకాలాదిమనాదిరూపం పునాతు మాం తత్సవితుర్వరేణ్యం .. 148..

యన్మండలం విష్ణుచతుర్ముఖాఖ్యం యదక్షరం పాపహారం జనానాం .

యత్కాలకల్పక్షయకారణం చ పునాతు మాం తత్సవితుర్వరేణ్యం .. 149..

యన్మండలం విశ్వసృజాం ప్రసిద్ధముత్పత్తిరక్షాంప్రలయప్రగల్భం .

యస్మింజగత్సంహరతేఽఖిలం చ పునాతు మాం తత్సవితుర్వరేణ్యం .. 150..

యన్మండలం సర్వగతస్య విష్ణోరాత్మా పరం ధామ విశుద్ధతత్త్వం .

సూక్ష్మాంతరైర్యోగపథానుగమ్యం పునాతు మాం తత్సవితుర్వరేణ్యం .. 151..

యన్మండలం బ్రహ్మవిదో వదంతి గాయంతి యచ్చారణసిద్ధసంఘాః .

యన్మండలం వేదవిదః స్మరంతి పునాతు మాం తత్సవితుర్వరేణ్యం .. 152..

యన్మండలం వేదవిదోపగీతం యద్యోగినాం యోగపథాతుగమ్యం .

తత్సర్వవేదం ప్రణమామి సూర్యం పునాతు మాం తత్సవితుర్వరేణ్యం .. 153..

మండలాష్టమిదం పుణ్యం యః పఠేత్సతతం నరః .

సర్వపాపవిశుద్ధాత్మా సూర్యలోకే మహీయతే .. 154..

ధ్యేయః సదాసవితృమండలమధ్యవర్తీ నారాయణః సరసిజాసన సన్నివిష్టః .

కేయూరవాన్మకరకుండలవాన్ కిరీటీ హారీ హిరణ్మయవపుర్ధృతశంఖచక్రః .. 155..

సశంఖచక్రం రవిమండలే స్థితం కుశేశయాక్రాంతమనంతమచ్యుతం .

భజామి బుద్ధయా తపనీయమూర్తిం సురోత్తమం చిత్రవిభూషణోజ్జ్వలం .. 156..

ఏవం బ్రహ్మాదయో దేవా ఋషయశ్చ తపోధనాః .

కీర్తయంతి సురశ్రేష్ఠం దేవం నారాయణం బిభువ .. 157..

వేదవేదాంగశరీరం దివ్యదీప్తికరం పరం .

రక్షోశ్నం రక్తవర్ణం చ సృష్టిసంహారకారకం .. 158..

ఏకచక్రో రథో యస్య దివ్యః కనకభూషితః .

స మే భవతు సుప్రీతః పద్మహస్తో దివాకరః .. 159..

ఆదిత్యః ప్రథమం నామ ద్వితీయం తు దివాకరః .

తృతీయం భాస్కరః ప్రోక్తం చతుర్థం తు ప్రభాకరః .. 160..

పంచమం తు సహస్రాంశుః షష్ఠం చైవ త్రిలోచనః .

సప్తమం హరిదశ్వశ్చ అష్టమం తు విభావసుః .. 161..

నవమం దినకృత్ప్రోక్తం దశమం ద్వాదశాత్మకం .

ఏకాదశం త్రయీముర్తిర్ద్వాదశం సూర్య ఏవ చ .. 162..

ద్వాదశాదిత్యనామాని ప్రాతఃకాలే పఠేన్నరః .

దుఃస్వప్ననాశనం చైవ సర్వదుఃఖం చ నశ్యతి .. 163..

దద్రుకుష్ఠహరం చైవ దారిద్ర్యం హరతే ధ్రువం .

సర్వతీర్థప్రదం చైవ సర్వకామప్రవర్ధనం .. 164..

యః పఠేత్మాతరుత్థాయ భక్త్యా నిత్యమిదం నరః .

సౌఖ్యమాయుస్తథాఽఽరోగ్యం లభతే మోక్షమేవ చ .. 15..

అగ్నిమీడే నమస్తుభ్యమిషేత్వోర్జేస్వరూపిణే .

అగ్ర ఆయాహి పీతస్త్వం నమస్తే జ్యోతిషాం పతే .. 166..

శన్నో దేవి నమస్తుభ్యం జగచ్చక్షుర్నమోఽస్తు తే .

పంచమాయోపవేదాయ నమస్తుభ్యం నమోనమః .. 167..

పద్మాసనః పద్మకరః పద్మగర్భసమద్యుతిః .

సప్తాశ్వరథసంయుక్తో ద్విభుజః స్యాత్సదా రవిః .. 168..

ఆదిత్యస్య నమస్కారం యే కుర్వంతి దినేదినే .

జన్మాంతరసహస్రేషు దారిద్ర్యం నోపజాయతే .. 169..

(నమో ధర్మనిధానాయ నమః సుకృతసాక్షిణే .

నమః ప్రత్యక్షదేవాయ భాస్కరాయ నమోనమః ..

అపరః శరణం నాస్తి త్వమేవ శరణం మమ .

తస్మాత్కారుణ్యభావేన రక్ష రక్ష దివాకర ..

పౌరోహిత్యం రజనిచరణం గ్రామణీత్వం నిః యోగో

     మాఠాపత్యం వితథవచనం సాక్షివాదః పరాన్నం .

బ్రహ్మద్వేష ఖలజనరతిః ప్రాణిషు నిర్దయత్వం

     మాభూదేతన్మమ దినపతే జన్మజన్మాంతరేఽపి ..

ఉదయంస్తు మహాభానుస్తేజసా చాభయంకరః .

సహస్రరశ్మిదీప్తశ్చత్వాదిత్యః ప్రీయతాం మమ ..)

ఉదయగిరిముపేతం భాస్కరం పద్మహస్తం

    నిఖిలభువననేత్రం రత్నంరత్నోపమేయం .

తిమిరకరిమృగేంద్రం బోధకం పద్మినీనాం

    సురవరమభివందే సుందరం విశ్వవంద్యం .. 170..

ఇతి శ్రీభవిష్యోత్తరపురాణే శ్రీకృష్ణార్జునసంవాదే

ఆదిత్యహృదయస్తోత్రం సంపూర్ణం ..

----------------------------------------------------------

----------------------------------------------------------