చక్షుషోపనిషత్

-------------------------

-------------------------

 శ్రీ  సూర్యశతకం - మయూరశతకం

-------------------------------------------------------------------------------------------------------------

-------------------------------------------------------------------------------------------------------------

జంభారాతీభకుంభోద్భవమివ దధతః సాంద్రసిందూరరేణుం

రక్తాః సిక్తా ఇవౌఘైరుదయగిరితటీధాతుధారాద్రవస్య . 

ఆయాంత్యా తుల్యకాలం కమలవనరుచేవారుణా వో విభూత్యై

భూయాసుర్భాసయంతో భువనమభినవా భానవో భానవీయాః .. 1..

భక్తిప్రహ్వాయ దాతుం ముకులపుటకుటీకోటరక్రోడలీనాం

లక్ష్మీమాక్రష్టుకామా ఇవ కమలవనోద్ధాటనం కుర్వతే యే .

కాలాకారాంధకారాననపతితజగత్సాధ్వసధ్వంసకల్యాః

కల్యాణం వః క్రియాసుః కిసలయరుచయస్తే కరా భాస్కరస్య .. 2..

గర్భేష్వంభోరుహాణాం శిఖరిషు చ శితాగ్రేషు తుల్యం పతంతః

ప్రారంభే వాసరస్య వ్యుపరతిసమయే చైకరూపాస్తథైవ .

నిష్పర్యాయం ప్రవృత్తాస్త్రిభువనభవనప్రాంగణే పాంతు యుష్మా-

నూష్మాణం సంతతాధ్వశ్రమజమివ భృశం బిభ్రతో బ్రధ్నపాదాః .. 3.. 

ప్రభ్రశ్యత్యుత్తరీయత్విషి తమసి సముద్దీక్ష్య వీతావృతీన్ప్రా-

గ్జంతూంస్తంతూన్యథా యానతను వితనుతే తిగ్మరోచిర్మరీచీన్ .

తే సాంద్రీభూయ సద్యః క్రమవిశదదశాశాదశాలీవిశాలం

శశ్వత్సంపాదయంతోఽమ్బరమమలమలం మంగలం వో దిశంతు .. 4..

న్యక్కుర్వన్నోషధీశే ముషితరుచి శుచేవౌషధీః ప్రోషితాభా

భాస్వద్గ్రావోద్గతేన ప్రథమమివ కృతాభ్యుద్గతిః పావకేన .

పక్షచ్ఛేదవ్రణాసృక్స్రుత ఇవ దృషదో దర్శయన్ప్రాతరద్రే-

రాతామ్రస్తీవ్రభానోరనభిమతనుదే స్తాద్గభస్త్యుద్గమో వః .. 5..

శీర్ణఘ్రాణాంఘ్రిపాణీన్వ్రణిభిరపఘనైర్ఘర్ఘరావ్యక్తఘోషాన్

దీర్ఘాఘ్రాతానఘౌఘై పునరపి ఘటయత్యేక ఉల్లాఘయన్ యః . 

ఘర్మాంశోస్తస్య వోఽన్తర్ద్విగుణఘనఘృణానిఘ్ననిర్విఘ్నవృత్తే-

ర్దత్తార్ఘాః సిద్ధసంఘైర్విదధతు ఘృణయః శీఘ్రమంహోవిధాతం .. 6..

బిభ్రాణా వామనత్వం ప్రథమమథ తథైవాంశవః ప్రాంశవో వః

క్రాంతాకాశాంతరాలాస్తదను దశదిశః పూరయంతస్తతోఽపి .

ధ్వాంతాదాచ్ఛిద్య దేవద్విష ఇవ బలితో విశ్వమాశ్వశ్నువానాః var   దేవద్రుహ

కృచ్ఛ్రాణ్యుచ్ఛ్రాయహేలోపహసితహరయో హారిదశ్వా హరంతు .. 7..

ఉద్గాఢేనారుణిమ్నా విదధతి బహులం యేఽరుణస్యారుణత్వం

మూర్ధోద్ధూతౌ ఖలీనక్షతరుధిరరుచో యే రథాశ్వాననేషు .

శైలానాం శేఖరత్వం శ్రితశిఖరిశిఖాస్తన్వతే యే దిశంతు 

ప్రేంఖంతః ఖే ఖరాంశోః ఖచితదినముఖాస్తే మయూఖాః సుఖం వః .. 8..

దత్తానందాః ప్రజానాం సముచితసమయాకృష్టసృష్టైః పయోభిః 

పూర్వాహ్ణే విప్రకీర్ణా దిశి దిశి విరమత్యహ్ని సంహారభాజః .

దీప్తాంశోర్దీర్ఘదుఃఖప్రభవభవభయోదన్వదుత్తారనావో

గావో వః పావనానాం పరమపరిమితాం ప్రీతిముత్పాదయంతు .. 9..

బంధధ్వంసైకహేతుం శిరసి నతిరసాబద్ధసంధ్యాంజలీనాం

లోకానాం యే ప్రబోధం విదధతి విపులాంభోజఖండాశయేవ .

యుష్మాకం తే స్వచిత్తప్రథితపృథుతరప్రార్థనాకల్పవృక్షాః 

కల్పంతాం నిర్వికల్పం దినకరకిరణాః కేతవః కల్మషస్య .. 10..

ధారా రాయో ధనాయాపది సపది కరాలంబభూతాః ప్రపాతే

తత్త్వాలోకైకదీపాస్త్రిదశపతిపురప్రస్థితౌ వీథ్య ఏవ .

నిర్వాణోద్యోగియోగిప్రగమనిజతనుద్వారి వేత్రాయమాణా-

స్త్రాయంతాం తీవ్రభానోర్దివసముఖసుఖా రశ్మయః కల్మషాద్వః  .. 11..

var   తీవ్రభాసః var   కశ్మలాద్వః

ప్రాచి ప్రాగాచరంత్యోఽనతిచిరమచలే చారుచూడామణిత్వం

ముంచంత్యో రోచనాంభః ప్రచురమివ దిశాముచ్చకైశ్చర్చనాయ .

చాటూత్కైశ్చక్రనామ్నాం చతురమవిచలైర్లోచనైరర్చ్యమానా-

శ్చేష్టంతాం చింతితానాముచితమచరమాశ్చండరోచీరుచో వః .. 12..

ఏకం జ్యోతిర్దృశౌ ద్వే త్రిజగతి గదితాన్యబ్జజాస్యైశ్చతుర్భి-

ర్భూతానాం పంచమం యాన్యలమృతుషు తథా షట్సు నానావిధాని .

యుష్మాకం తాని సప్తత్రిదశమునినుతాన్యష్టదిగ్భాంజి భానో-

ర్యాంతి ప్రాహ్ణే నవత్వం దశ దధతు శివం దీధితీనాం శతాని  ..

ఆవృత్తిభ్రాంతవిశ్వాః శ్రమమివ దధతః శోషిణః  స్వోష్మణేవ

గ్రీష్మే దావాగ్నితప్తా ఇవ రసమసకృద్యే ధరిత్ర్యా ధయంతి .

తే ప్రావృష్యాత్తపానాతిశయరుజ ఇవోద్వాంతతోయా హిమర్తౌ

మార్తండస్యాప్రచండాశ్చిరమశుభభిదేఽభీషవో వో భవంతు .. 14..

తన్వానా దిగ్వధూనాం సమధికమధురాలోకరమ్యామవస్థా-

మారుఢప్రౌఢిలేశోత్కలితకపిలిమాలంకృతిః కేవలైవ .

ఉజ్జృంభాంభోజనేత్రద్యుతిని దినముఖే కించిదుద్భిద్యమానా

శ్మశ్రుశ్రేణీవ భాసాం దిశతు దశశతీ శర్మ ఘర్మత్విషో వః .. 15..

మౌలీందోర్మైష మోషీద్ద్యుతిమితి వృషభాంకేన యః శంకినేవ

ప్రత్యగ్రోద్ఘాటితాంభోరుహకుహరగుహాసుస్థితేనేవ ధాత్రా .

కృష్ణేన ధ్వాంతకృష్ణస్వతనుపరిభవత్రస్నునేవ స్తుతోఽలం

త్రాణాయ స్తాత్తనీయానపి తిమిరరిపోః స త్విషాముద్గమో వః  .. 16..

విస్తీర్ణం వ్యోమ దీర్ఘాః సపది దశ దిశో వ్యస్తవేలాంభసోఽబ్ధీన్

కుర్వద్భిర్దృశ్యనానానగనగరనగాభోగపృథ్వీం చ పృథ్వీం .

పద్మిన్యుచ్ఛ్వాస్యతే యైరుషసి జగదపి ధ్వంసయిత్వా తమిస్రా-

ముస్రా విస్రంసయంతు ద్రుతమనభిమతం తే సహస్రత్విషో వః  .. 17.. 

అస్తవ్యస్తత్వశూన్యో నిజరుచిరనిశానశ్వరః కర్తుమీశో

విశ్వం వేశ్మేవ దీపః ప్రతిహతతిమిరం యః ప్రదేశస్థితోఽపి .

దిక్కాలాపేక్షయాసౌ త్రిభువనమటతస్తిగ్మభానోర్నవాఖ్యాం

యాతః శాతక్రతవ్యాం దిశి దిశతు శివం సోఽర్చిషాముద్గమో వః .. 18..

మాగాన్మ్లానిం మృణాలీ మృదురితి దయయేవాప్రవిష్టోఽహిలోకం

లోకాలోకస్య పార్శ్వం ప్రతపతి న పరం యస్తదాఖ్యార్థమేవ .

ఊర్ధ్వం బ్రహ్మాండఖండస్ఫుటనభయపరిత్యక్తదైర్ఘ్యో ద్యుసీమ్ని

స్వేఛావశ్యావకాశావధిరవతు స వస్తాపనో రోచిరోఘః .. 19..

అశ్యామః కాల ఏకో న భవతి భువనాంతోఽపి వీతేఽన్ధకారే 

సద్యః ప్రాలేయపాదో న విలయమచలశ్చంద్రమా అప్యుపైతి .

బంధః సిద్ధాంజలీనాం న హి కుముదవనస్యాపి యత్రోజ్జిహానే

తత్ప్రాతః ప్రేక్షణీయం దిశతు దినపతేర్ధామ కామాధికం వః  .. 20..

యత్కాంతిం పంకజానాం న హరతి కురుతే ప్రత్యుతాధిక్యరమ్యాం 

నో ధత్తే తారకాభాం తిరయతి నితరామాశు యన్నిత్యమేవ  . 

కర్తుం నాలం నిమేషం దివసమపి పరం యత్తదేకం త్రిలోక్యా-

శ్చక్షుః సామాన్యచక్షుర్విసదృశమఘభిద్భాస్వతస్తాన్మహో వః .. 21..

క్ష్మాం క్షేపీయః క్షపాంభఃశిశిరతరజలస్పర్శతర్షాదృతేవ

ద్రాగాశా నేతుమాశాద్విరదకరసరఃపుష్కరాణీవ బోధం  .

ప్రాతః ప్రోల్లంఘ్య విష్ణోః పదమపి ఘృణయేవాతివేగాద్దవీయ-

స్యుద్దామ ద్యోతమానా దహతు దినపతేర్దుర్నిమిత్తం ద్యుతిర్వః  .. 22..

నో కల్పాపాయవాయోరదయరయదలత్క్ష్మాధరస్యాపి గమ్యా

గాఢోద్గీర్ణోజ్జ్వలశ్రీరహని న రహితా నో తమఃకజ్జలేన .

ప్రాప్తోత్పత్తిః పతంగాన్న పునరుపగతా మోషముష్ణత్విషో వో

వర్తిః సైవాన్యరూపా సుఖయతు నిఖిలద్వీపదీపస్య దీప్తిః .. 23..

నిఃశేషాశావపూరప్రవణగురుగుణశ్లాఘనీయస్వరూపా

పర్యాప్తం నోదయాదౌ దినగమసమయోపప్లవేఽప్యున్నతైవ .

అత్యంతం యానభిజ్ఞా క్షణమపి తమసా సాకమేకత్ర వస్తుం

బ్రధ్నస్యేద్ధా రుచిర్వో రుచిరివ రుచితస్యాప్తయే వస్తునోస్తు .. 24.. 

విభ్రాణః శక్తిమాశు ప్రశమితబలవత్తారకౌర్జిత్యగుర్వీం

కుర్వాణో లీలయాధః శిఖినమపి లసచ్చంద్రకాంతావభాసం .

ఆదధ్యాదంధకారే రతిమతిశయినీమావహన్వీక్షణానాం 

బాలో లక్ష్మీమపారామపర ఇవ గుహోఽహర్పతేరాతపో వః .. 25..

జ్యోత్స్నాంశాకర్షపాండుద్యుతి తిమిరమషీశేషకల్మాషమీష-

జ్జృంభోద్భూతేన పింగం సరసిజరజసా సంధ్యయా శోణశోచిః .

ప్రాతఃప్రారంభకాలే సకలమపి జగచ్చిత్రమున్మీలయంతీ

కాంతిస్తీక్ష్ణత్విషోఽక్ష్ణాం ముదముపనయతాత్తూలికేవాతులాం వః .. 26..

ఆయాంతీ కిం సుమేరోః సరణిరరుణితా పాద్మరాగైః పరాగై-

రాహోస్విత్స్వస్య మాహారజనవిరచితా వైజయంతీ రథస్య .

మాంజిష్ఠీ ప్రష్ఠవాహావలివిధుతశిరశ్చామరాలీ ను లోకై- 

రాశంక్యాలోకితైవం సవితురఘనుదే స్తాత్ప్రభాతప్రభా వః .. 27..

ధ్వాంతధ్వంసం విధత్తే న తపతి రుచిమన్నాతిరూపం వ్యనక్తి

న్యక్త్వం నీత్వాపి నక్తం న వితరతితరాం తావదహ్నస్త్విషం యః .

స ప్రాతర్మా విరంసీదసకలపటిమా పూరయన్యుష్మదాశా-

మాశాకాశావకాశావతరణతరుణప్రక్రమోఽర్కప్రకాశః .. 28..

తీవ్రం నిర్వాణహేతుర్యదపి చ విపులం యత్ప్రకర్షేణ చాణు

ప్రత్యక్షం యత్పరోక్షం యదిహ యదపరం నశ్వరం శాశ్వతం చ .

యత్సర్వస్య ప్రసిద్ధం జగతి కతిపయే యోగినో యద్విదంతి

జ్యోతిస్తద్ద్విప్రకారం సవితురవతు వో బాహ్యమాభ్యంతరం చ .. 29..

రత్నానాం మండనాయ ప్రభవతి నియతోద్దేశలబ్ధావకాశం

వహ్నేర్దార్వాది దగ్ధుం నిజజడిమతయా కర్తుమానందమిందోః .

యచ్చ త్రైలోక్యభూషావిధిరఘదహనం హ్లాది వృష్ట్యాశు తద్వో 

బాహుల్యోత్పాద్యకార్యాధికతరమవతాదేకమేవార్కతేజః .. 30..

మీలచ్చక్షుర్విజిహ్మశ్రుతి జడరసనం నిఘ్నితఘ్రాణవృత్తి

స్వవ్యాపారాక్షమత్వక్పరిముషితమనః శ్వాసమాత్రావశేషం .

విస్రస్తాంగం పతిత్వా స్వపదపహరతాదశ్రియం వోఽర్కజన్మా 

కాలవ్యాలావలీఢం జగదగద ఇవోత్థాపయన్ప్రాక్ప్రతాపః .. 31..

నిఃశేషం నైశమంభః ప్రసభమపనుదన్నశ్రులేశానుకారి

స్తోకస్తోకాపనీతారుణరుచిరచిరాదస్తదోషానుషంగః .

దాతా దృష్టిం ప్రసన్నాం త్రిభువననయనస్యాశు యుష్మద్విరుద్ధం

వధ్యాద్బ్రధ్నస్య సిద్ధాంజనవిధిరపరః ప్రాక్తనోఽర్చిఃప్రచారః .. 32..

భూత్వా జంభస్య భేత్తుః కకుభి పరిభవారంభభూః శుభ్రభానో- 

ర్బిభ్రాణా బభ్రుభావం ప్రసభమభినవాంభోజజృంభాప్రగల్భా  .

భూషా భూయిష్ఠశోభా త్రిభువనభవనస్యాస్య వైభాకరీ ప్రాగ్-

విభ్రాంతా భ్రాజమానా విభవతు విభవోద్భూతయే సా విభా వః .. 33.

సంసక్తం సిక్తమూలాదభినవభువనోద్యానకౌతూహలిన్యా

యామిన్యా కన్యయేవామృతకరకలశావర్జితేనామృతేన .

అర్కాలోకః క్రియాద్వో ముదముదయశిరశ్చక్రవాలాలవాలా-

దుద్యన్బాలప్రవాలప్రతిమరుచిరహఃపాదపప్రాక్ప్రరోహః .. 34..

భిన్నం భాసారుణస్య క్వచిదభినవయా విద్రుమాణాం త్విషేవ

త్వఙ్న్నక్షత్రరత్నద్యుతినికరకరాలాంతరాలం క్వచిచ్చ .

నాంతర్నిఃశేషకృష్ణశ్రియముదధిమివ ధ్వాంతరాశిం పిబన్స్తా-

దౌర్వః పూర్వోఽప్యపూర్వోఽగ్నిరివ భవదఘప్లుష్టయేఽర్కావభాసః .. 35..

గంధర్వైర్గద్యపద్యవ్యతికరితవచోహృద్యమాతోద్యవాద్యై-

రాద్యైర్యో నారదాద్యైర్మునిభిరభినుతో వేదవేద్యైర్విభిద్య .

 var   వీతవేద్యైర్వివిద్య, వేదవిద్భిర్విభిద్య

ఆసాద్యాపద్యతే యం పునరపి చ జగద్యౌవనం సద్య ఉద్య-

న్నుద్ద్యోతో ద్యోతితద్యౌర్ద్యతు దివసకృతోఽసావవద్యాని వోఽద్య .. 36..

ఆవానైశ్చంద్రకాంతైశ్చ్యుతతిమిరతయా తానవాత్తారకాణా- 

మేణాంకాలోకలోపాదుపహతమహసామోషధీనాం లయేన .

ఆరాదుత్ప్రేక్ష్యమాణా క్షణముదయతటాంతర్హితస్యాహిమాంశో-

రాభా ప్రాభాతికీ వోఽవతు న తు నితరాం తావదావిర్భవంతీ .. 37..

సానౌ సా నౌదయే నారుణితదలపునర్యౌవనానాం వనానా-

మాలీమాలీఢపూర్వా పరిహృతకుహరోపాంతనిమ్నా తనిమ్నా .

భా వోఽభావోపశాంతిం దిశతు దినపతేర్భాసమానా సమానా-

రాజీ రాజీవరేణోః సమసమయముదేతీవ యస్యా వయస్యా .. 38..

ఉజ్జృంభాంభోరుహాణాం ప్రభవతి పయసాం యా శ్రియే నోష్ణతాయై

పుష్ణాత్యాలోకమాత్రం న తు దిశతి దృశాం దృశ్యమానా విధాతం .

పూర్వాద్రేరేవ పూర్వం దివమను చ పునః పావనీ దిఙ్ముఖానా- 

మేనాంస్యైనీ విభాసౌ నుదతు నుతిపదైకాస్పదం ప్రాక్తనీ వః .. 39..

వాచాం వాచస్పతేరప్యచలభిదుచితాచార్యకాణాం ప్రపంచై-

ర్వైరంచానాం తథోచ్చారితచతురఋచాం చాననానాం చతుర్ణాం . 

ఉచ్యేతార్చాసు వాచ్యచ్యుతిశుచిచరితం యస్య నోచ్చైర్వివిచ్య 

ప్రాచ్యం వర్చశ్చకాసచ్చిరముపచినుతాత్తస్య చండార్చిషో వః .. 40.. 

మూర్ధ్న్యద్రేర్ధాతురాగస్తరుషు కిసలయో విద్రుమౌఘః సముద్రే 

var - కిసలయాద్విద్రుమౌఘాత్సముద్రే

దిఙ్మాతంగోత్తమాంగేష్వభినవనిహితః సాంద్రసిందూరరేణుః . 

సీమ్ని వ్యోమ్నశ్చ హేమ్నః సురశిఖరిభువో జాయతే యః ప్రకాశః

శోణిమ్నాసౌ ఖరాంశోరుషసి దిశతు వః శర్మ శోభైకదేశః .. 41..

అస్తాద్రీశోత్తమాంగే శ్రితశశిని తమఃకాలకూటే నిపీతే

యాతి వ్యక్తిం పురస్తాదరుణకిసలయే ప్రత్యుషఃపారిజాతే .

ఉద్యంత్యారక్తపీతాంబరవిశదతరోద్వీక్షితా తీక్ష్ణభానో-

ర్లక్ష్మీర్లక్ష్మీరివాస్తు స్ఫుటకమలపుటాపాశ్రయా శ్రేయసే వః .. 42.. 

నోదన్వాంజన్మభూమిర్న తదుదరభువో బాంధవాః కౌస్తుభాద్యా

యస్యాః పద్మం న పాణౌ న చ నరకరిపూరఃస్థలీ వాసవేశ్మ .

తేజోరూపాపరైవ త్రిషు భువనతలేష్వాదధానా వ్యవస్థాం 

సా శ్రీః శ్రేయాంసి దిశ్యాదశిశిరమహసో మండలాగ్రోద్గతా వః .. 43..

          .. ఇతి తేజోవర్ణనం

 

          .. అథ అశ్వవర్ణనం ..

రక్షంత్వక్షుణ్ణహేమోపలపటలమలం లాఘవాదుత్పతంతః

పాతంగాః పంగ్వవజ్ఞాజితపవనజవా వాజినస్తే జగంతి .

యేషాం వీతాన్యచిహ్నోన్నయమపి వహతాం మార్గమాఖ్యాతి మేరా-

వుద్యన్నుద్దామదీప్తిర్ద్యుమణిమణిశిలావేదికాజాతవేదాః .. 44..

ప్లుష్టాః పృష్ఠేంఽశుపాతైరతినికటతయా దత్తదాహాతిరేకై-

రేకాహాక్రాంతకృత్స్నత్రిదివపథపృథుశ్వాసశోషాః శ్రమేణ .

తీవ్రోదన్యాస్త్వరంతామహితవిహతయే సప్తయః సప్తసప్తే-

రభ్యాశాకాశగంగాజలసరలగలావాఙ్నతాగ్రాననా వః .. 45.. 

మత్వాన్యాన్పార్శ్వతోఽశ్వాన్ స్ఫటికతటదృషద్దృష్టదేహా ద్రవంతీ

వ్యస్తేఽహన్యస్తసంధ్యేయమితి మృదుపదా పద్మరాగోపలేషు .

సాదృశ్యాదృశ్యమూర్తిర్మరకతకటకే క్లిష్టసూతా సుమేరో-

ర్మూర్ధన్యావృత్తిలబ్ధధ్రువగతిరవతు బ్రధ్నవాహావలిర్వః .. 46.. 

హేలాలోలం వహంతీ విషధరదమనస్యాగ్రజేనావకృష్టా

స్వర్వాహిన్యాః సుదూరం జనితజవజయా స్యందనస్య స్యదేన  .

నిర్వ్యాజం తాయమానే హరితిమని నిజే స్ఫీతఫేనాహితశ్రీ- 

రశ్రేయాంస్యశ్వపంక్తిః శమయతు యమునేవాపరా తాపనీ వః .. 47..

మార్గోపాంతే సుమేరోర్నువతి కృతనతౌ నాకధామ్నాం నికాయే

వీక్ష్య వ్రీడానతానాం ప్రతికుహరముఖం కింనరీణాం ముఖాని .

సూతేఽసూయత్యపీషజ్జడగతి వహతాం కంధరార్ధైర్వలద్భి- 

ర్వాహానాం వ్యస్యతాద్వః సమమసమహరేర్హేషితం కల్మషాణి  .. 48..

ధున్వంతో నీరదాలీర్నిజరుచిహరితాః పార్శ్వయోః పక్షతుల్యా-

స్తాలూత్తానైః ఖలీనైః ఖచితముఖరుచశ్చ్యోతతా లోహితేన .

ఉడ్డీయేవ వ్రజంతో వియతి గతివశాదర్కవాహాః క్రియాసుః

క్షేమం హేమాద్రిహృద్యద్రుమశిఖరశిరఃశ్రేణిశాఖాశుకా వః .. 49..

          .. ఇత్యశ్వవర్ణనం ..

          .. అథ అరుణవర్ణనం ..

ప్రాతః శైలాగ్రరంగే రజనిజవనికాపాయసంలక్ష్యలక్ష్మీ-

ర్విక్షిప్తాపూర్వపుష్పాంజలిముడునికరం సూత్రధారాయమాణః .

యామేష్వంకేష్వివాహ్నః కృతరుచిషు చతుర్ష్వేవ జాతప్రతిష్ఠా- 

మవ్యాత్ప్రస్తావయన్వో జగదటనమహానాటికాం సూర్యసూతః .. 50..

ఆక్రాంత్యా వాహ్యమానం పశుమివ హరిణా వాహకోఽగ్ర్యో హరీణాం

భ్రామ్యంతం పక్షపాతాజ్జగతి సమరుచిః సర్వకర్మైకసాక్షీ .

శత్రుం నేత్రశ్రుతీనామవజయతి వయోజ్యేష్ఠభావే సమేఽపి

స్థామ్నాం ధామ్నాం నిధిర్యః స భవదఘనుదే నూతనః స్తాదనూరుః .. 51..

దత్తార్ఘైర్దూరనమ్రైర్వియతి వినయతో వీక్షితః సిద్ధసార్థైః 

సానాథ్యం సారథిర్వః స దశశతరుచేః సాతిరేకం కరోతు  .

ఆపీయ ప్రాతరేవ ప్రతతహిమపయఃస్యందినీరిందుభాసో

యః కాష్ఠాదీపనోఽగ్రే జడిత ఇవ భృశం సేవతే పృష్ఠతోఽర్కం .. 52..

ముంచన్రశ్మీందినాదౌ దినగమసమయే సంహరంశ్చ స్వతంత్ర-

స్తోత్రప్రఖ్యాతవీర్యోఽవిరతహరిపదాక్రాంతిబద్ధాభియోగః . 

కాలోత్కర్షాల్లఘుత్వం ప్రసభమధిపతౌ యోజయన్యో ద్విజానాం

సేవాప్రీతేన పూష్ణాత్మసమ ఇవ కృతస్త్రాయతాం సోఽరుణో వః .. 53.. 

శాతః శ్యామాలతాయాః పరశురివ తమోఽరణ్యవహ్నేరివార్చిః 

ప్రాచ్యేవాగ్రే గ్రహీతుం గ్రహకుముదవనం ప్రాగుదస్తోఽగ్రహస్తః . 

ఐక్యం భిందంద్యుభూమ్యోరవధిరివ విధాతేవ విశ్వప్రబోధే

వాహానాం వో వినేతా వ్యపనయతు విపన్నామ ధామాధిపస్య .. 54..

పౌరస్త్యస్తోయదర్తోః పవన ఇవ పతత్పావకస్యేవ ధూమో var   పతన్

విశ్వస్యేవాదిసర్గః ప్రణవ ఇవ పరం పావనో వేదరాశేః

సంధ్యానృత్యోత్సవేచ్ఛోరివ మదనరిపోర్నందినాందీనినాదః

సౌరస్యాగ్రే సుఖం వో వితరతు వినతానందనః స్యందనస్య .. 55.. 

పర్యాప్తం తప్తచామీకరకటకతటే శ్లిష్టశీతేతరాంశా-

వాసీదత్స్యందనాశ్వానుకృతిమరకతే పద్మరాగాయమాణః  . 

యః సోత్కర్షాం విభూషాం కురుత ఇవ కులక్ష్మాభృదీశస్య మేరో-

రేనాంస్యహ్నాయ దూరం గమయతు స గురుః కాద్రవేయద్విషో వః .. 56..

నీత్వాశ్వాన్సప్త కక్షా ఇవ నియమవశం వేత్రకల్పప్రతోద- 

స్తూర్ణం ధ్వాంతస్య రాశావితరజన ఇవోత్సారితే దూరభాజి .

పూర్వం ప్రష్ఠో రథస్య క్షితిభృదధిపతీందర్శయంస్త్రాయతాం వ-

స్త్రైలోక్యాస్థానదానోద్యతదివసపతేః ప్రాక్ప్రతీహారపాలః .. 57..

వజ్రింజాతం వికాసీక్షణకమలవనం భాసి నాభాసి వహ్నే! 

తాతం నత్వాశ్వపార్శ్వాన్నయ యమ! మహిషం రాక్షసా వీక్షితాః స్థ .

సప్తీన్సించ ప్రచేతః! పవన! భజ జవం విత్తపావేదితస్త్వం

వందే శర్వేతి జల్పన్ప్రతిదిశమధిపాన్పాతు పూష్ణోఽగ్రణీర్వః .. 58..

పాశానాశాంతపాలాదరుణ వరుణతో మా గ్రహీః ప్రగ్రహార్థం

తృష్ణాం కృష్ణస్య చక్రే జహిహి నహి రథో యాతి మే నైకచక్రః .

యోక్తుం యుగ్యం కిముచ్చైఃశ్రవసమభిలషస్యష్టమం వృత్రశత్రో- 

స్త్యక్తాన్యాపేక్షవిశ్వోపకృతిరివ రవిః శాస్తి యం సోఽవతాద్వః .. 59..

నో మూర్చ్ఛాచ్ఛిన్నవాంఛః శ్రమవివశవపుర్నైవ నాప్యాస్యశోషీ

పాంథః పథ్యేతరాణి క్షపయతు భవతాం భాస్వతోఽగ్రేసరః సః .

యః సంశ్రిత్య త్రిలోకీమటతి పటుతరైస్తాప్యమానో మయూఖై-

రారాదారామలేఖామివ హరితమణిశ్యామలామశ్వపంక్తిం .. 60..

సీదంతోఽన్తర్నిమజ్జజ్జడఖురముసలాః సైకతే నాకనద్యాః

స్కందంతః కందరాలీః కనకశిఖరిణో మేఖలాసు స్ఖలంతః .

దూరం దూర్వాస్థలోత్కా మరకతదృషది స్థాస్నవో యన్న యాతాః

పూష్ణోఽశ్వాః పూరయంస్తైస్తదవతు జవనైర్హుంకృతేనాగ్రగో వః .. 61.. 

          .. ఇత్యరుణవర్ణనం .. var   సూతవర్ణనం

          .. అథ రథవర్ణనం ..

పీనోరఃప్రేరితాభ్రైశ్చరమఖురపుటాగ్రస్థితైః ప్రాతరద్రా-

వాదీర్ఘాంగైరుదస్తో హరిభిరపగతాసంగనిఃశబ్దచక్రః .

ఉత్తానానూరుమూర్ధావనతిహఠభవద్విప్రతీపప్రణామః

ప్రాహ్ణే శ్రేయో విధత్తాం సవితురవతరన్వ్యోమవీథీం రథో వః .. 62..

ధ్వాంతౌఘధ్వంసదీక్షావిధిపటు వహతా ప్రాక్సహస్రం కరాణా- 

మర్యమ్ణా యో గరిమ్ణః పదమతులముపానీయతాధ్యాసనేన .

స శ్రాంతానాం నితాంతం భరమివ మరుతామక్షమాణాం విసోఢుం

స్కంధాత్స్కంధం వ్రజన్వో వృజినవిజితయే భాస్వతః స్యందనోఽస్తు .. 63..

యోక్త్రీభూతాన్యుగస్య గ్రసితుమివ పురో దందశూకాందధానో

ద్వేధావ్యస్తాంబువాహావలివిహితబృహత్పక్షవిక్షేపశోభః .

సావిత్రః స్యందనోఽసౌ నిరతిశయరయప్రీణితానూరురేనః-

క్షేపీయో వో గరుత్మానివ హరతు హరీచ్ఛావిధేయప్రచారః .. 64..

ఏకాహేనైవ దీర్ఘాం త్రిభువనపదవీం లంఘయన్ యో లఘిష్ఠః 

పృష్ఠే మేరోర్గరీయాన్ దలితమణిదృషత్త్వింషి పింషఞ్శిరాంసి .

సర్వస్యైవోపరిష్టాదథ చ పునరధస్తాదివాస్తాద్రిమూర్న్ధి

బ్రధ్నస్యావ్యాత్స ఏవం దురధిగమపరిస్పందనః స్యందనో వః .. 65..

ధూర్ధ్వస్తాగ్ర్యగ్రహాణి ధ్వజపటపవనాందోలితేందూని దూరం 

రాహౌ గ్రాసాభిలాషాదనుసరతి పునర్దత్తచక్రవ్యథాని .

శ్రాంతాశ్వశ్వాసహేలాధుతవిబుధధునీనిర్ఝరాంభాంసి భద్రం

దేయాసుర్వో దవీయో దివి దివసపతేః స్యందనప్రస్థితాని .. 66..

అక్షే రక్షాం నిబధ్య ప్రతిసరవలయైర్యోజయంత్యో యుగాగ్రం

ధూఃస్తంభే దగ్ధధూపాః ప్రహితసుమనసో గోచరే కూబరస్య .

చర్చాశ్చక్రే చరంత్యో మలయజపయసా సిద్ధవధ్వస్త్రిసంధ్యం 

వందంతే యం ద్యుమార్గే స నుదతు దురితాన్యంశుమత్స్యందనో వః .. 67..

ఉత్కీర్ణస్వర్ణరేణుద్రుతఖురదలితా పార్శ్వయోః శశ్వదశ్వై- 

రశ్రాంతభ్రాంతచక్రక్రమనిఖిలమిలన్నేమినిమ్నా భరేణ .

మేరోర్మూర్ధన్యఘం వో విఘటయతు రవేరేకవీథీ రథస్య

స్వోష్మోదక్తాంబురిక్తప్రకటితపులినోద్ధూసరా స్వర్ధునీవ .. 68.. 

నంతుం నాకాలయానామనిశమనుయతాం పద్ధతిః పంక్తిరేవ 

క్షోదో నక్షత్రరాశేరదయరయమిలచ్చక్రపిష్టస్య ధూలిః .

హేషహ్లాదో హరీణాం సురశిఖరిదరీః పూరయన్నేమినాదో 

యస్యావ్యాత్తీవ్రభానోః స దివి భువి యథా వ్యక్తచిహ్నో రథో వః .. 69..

నిఃస్పందానాం విమానావలివితతదివాం దేవవృందారకాణాం 

వృందైరానందసాంద్రోద్యమమపి వహతాం విందతాం వందితుం నో .

మందాకిన్యామమందః పులినభృతి మృదుర్మందరే మందిరాభే 

మందారైర్మండితారం దధదరి దినకృత్స్యందనః స్తాన్ముదే వః  .. 70..

చక్రీ చక్రారపంక్తిం హరిరపి చ హరీన్ ధూర్జటిర్ధూర్ధ్వజాంతా-

నక్షం నక్షత్రనాథోఽరుణమపి వరుణః కూబరాగ్రం కుబేరః .

రంహః సంఘః సురాణాం జగదుపకృతయే నిత్యయుక్తస్య యస్య

స్తౌతి ప్రీతిప్రసన్నోఽన్వహమహిమరుచేః సోఽవతాత్స్యందనో వః .. 71.. 

నేత్రాహీనేన మూలే విహితపరికరః సిద్ధసాధ్యైర్మరుద్భిః

పాదోపాంతే స్తుతోఽలం బలిహరిరభసాకర్షణాబద్ధవేగః .

భ్రామ్యన్వ్యోమాంబురాశావశిశిరకిరణస్యందనః సంతతం వో

దిశ్యాల్లక్ష్మీమపారామతులితమహిమేవాపరో మందరాద్రిః .. 72.. 

          .. ఇతి రథవర్ణనం ..

          .. అథ మండలవర్ణనం ..

యజ్జ్యాయో బీజమహ్నామపహతతిమిరం చక్షుషామంజనం య- 

ద్ద్వారం యన్ముక్తిభాజాం యదఖిలభువనజ్యోతిషామేకమోకః .

యద్వృష్ట్యంభోనిధానం ధరణిరససుధాపానపాత్రం మహద్య-

ద్దిశ్యాదీశస్య భాసాం తదధీకలమలం మంగలం మండలం వః .. 73..

భానోః తదధికమమలం మండలం మంగలం 

వేలావర్ధిష్ణు సింధోః పయ ఇవ ఖమివార్ధోద్గతాగ్య్రగ్రహోడు

స్తోకోద్భిన్నస్వచిహ్నప్రసవమివ మధోరాస్యమస్యన్మనాంసి . 

ప్రాతః పూష్ణోఽశుభాని ప్రశమయతు శిరఃశేఖరీభూతమద్రేః

పౌరస్త్యస్యోద్గభస్తిస్తిమితతమతమఃఖండనం మండలం వః .. 74..

ప్రత్యుప్తస్తప్తహేమోజ్జ్వలరుచిరచలః పద్మరాగేణ యేన

జ్యాయః కింజల్కపుంజో యదలికులశితేరంబరేందీవరస్య .

కాలవ్యాలస్య చిహ్నం మహితతమమహోమూర్న్ధి రత్నం మహద్య-

ద్దీప్తాంశోః ప్రాతరవ్యాత్తదవికలజగన్మండనం మండలం వః .. 75..

కస్త్రాతా తారకాణాం పతతి తనురవశ్యాయబిందుర్యథేందు-

ర్విద్రాణా దృక్స్మరారేరురసి మురరిపోః కౌస్తుభో నోద్గభస్తిః .

వహ్నేః సాపహ్నవేవ ద్యుతిరుదయగతే యత్ర తన్మండలం వో

మార్తండీయం పునీతాద్దివి భువి చ తమాంసీవ మృష్ణన్మహాంసి .. 76..

యత్ప్రాచ్యాం ప్రాక్చకాస్తి ప్రభవతి చ యతః ప్రాచ్యసావుజ్జిహానా-

దిద్ధం మధ్యే యదహ్నో భవతి తతరుచా యేన చోత్పాద్యతేఽహః .

యత్పర్యాయేణ లోకానవతి చ జగతాం జీవితం యచ్చ తద్వో

విశ్వానుగ్రాహి విశ్వం సృజదపి చ రవేర్మండలం ముక్తయేఽస్తు .. 77..

శుష్యంత్యూఢానుకారా మకరవసతయో మారవీణాం స్థలీనాం

యేనోత్తప్తాః స్ఫుటంతస్తడితి తిలతులాం యాంత్యగేంద్రా యుగాంతే . 

తచ్చండాంశోరకాండత్రిభువనదహనాశంకయా ధామ కృచ్ఛాత్ 

సంహృత్యాలోకమాత్రం ప్రలఘు విదధతః స్తాన్ముదే మండలం వః .. 78.. 

ఉద్యద్ద్యూద్యానవాప్యాం బహులతమతమఃపంకపూరం విదార్య 

ప్రోద్భిన్నం పత్రపార్శ్వేష్వవిరలమరుణచ్ఛాయయా విస్ఫురంత్యా .

కల్యాణాని క్రియాద్వః కమలమివ మహన్మండలం చండభానో-

రన్వీతం తృప్తిహేతోరసకృదలికులాకారిణా రాహుణా యత్ .. 79..

చక్షుర్దక్షద్విషో యన్న తు దహతి పురః పూరయత్యేవ కామం 

నాస్తం జుష్టం మరుద్భిర్యదిహ నియమినాం యానపాత్రం భవాబ్ధౌ .

యద్వీతశ్రాంతి శశ్వద్భ్రమదపి జగతాం భ్రాంతిమభ్రాంతి హంతి

బ్రధ్నస్యాఖ్యాద్విరుద్ధక్రియమథ చ హితాధాయి తన్మండలం వః .. 80..

            .. ఇతి మండలవర్ణనం ..

            .. అథ సూర్యవర్ణనం .

సిద్ధైః సిద్ధాంతమిశ్రం శ్రితవిధి విబుధైశ్చారణైశ్చాటుగర్భం

గీత్యా గంధర్వముఖ్యైర్ముహురహిపతిభిర్యాతుధానైర్యతాత్మ .

సార్ధం సాధ్యైర్మునీంద్రైర్ముదితమతమనో మోక్షిభిః పక్షపాతా- 

త్ప్రాతః ప్రారభ్యమాణస్తుతిరవతు రవిర్విశ్వవంద్యోదయో వః .. 81..

భాసామాసన్నభావాదధికతరపటోశ్చక్రవాలస్య తాపా-

చ్ఛేదాదచ్ఛిన్నగచ్ఛత్తురగఖురపుటన్యాసనిఃశంకటంకైః .

నిఃసంగస్యందనాంగభ్రమణనికషణాత్పాతు వస్త్రిప్రకారం 

తప్తాంశుస్తత్పరీక్షాపర ఇవ పరితః పర్యటన్హాటకాద్రిం .. 82..

నో శుష్కం నాకనద్యా వికసితకనకాంభోజయా భ్రాజితం తు 

ప్లుష్టా నైవోపభోగ్యా భవతి భృశతరం నందనోద్యానలక్ష్మీః .

నో శృంగాణి ద్రుతాని ద్రుతమమరగిరేః కాలధౌతాని ధౌతా-

నీద్ధం ధామ ద్యుమార్గే మ్రదయతి దయయా యత్ర సోఽర్కోఽవతాద్వః .. 83..

ధ్వాంతస్యైవాంతహేతుర్న భవతి మలినైకాత్మనః పాప్మనోఽపి

ప్రాక్పాదోపాంతభాజాం జనయతి న పరం పంకజానాం ప్రబోధం .

కర్తా నిఃశ్రేయసానామపి న తు ఖలు యః కేవలం వాసరాణాం

సోఽవ్యాదేకోద్యమేచ్ఛావిహితబహుబృహద్విశ్వకార్యోఽర్యమా వః .. 84..

లోటఀల్లోష్టావిచేష్టః శ్రితశయనతలో నిఃసహీభూతదేహః

సందేహీ ప్రాణితవ్యే సపది దశ దిశః ప్రేక్షమాణోఽన్ధకారాః .

నిఃశ్వాసాయాసనిష్ఠః పరమపరవశో జాయతే జీవలోకః 

శోకేనేవాన్యలోకానుదయకృతి గతే యత్ర సోఽర్కోఽవతాద్వః .. 85.. 

క్రామఀల్లోలోఽపి లోకాఀస్తదుపకృతికృతావాశ్రితః స్థైర్యకోటిం

నౄణాం దృష్టిం విజిహ్మాం విదధదపి కరోత్యంతరత్యంతభద్రాం .

యస్తాపస్యాపి హేతుర్భవతి నియమినామేకనిర్వాణదాయీ

భూయాత్స ప్రాగవస్థాధికతరపరిణామోదయోఽర్కః శ్రియే వః .. 86..

వ్యాపన్నర్తుర్న కాలో వ్యభిచరతి ఫలం నౌషధీర్వృష్టిరిష్టా

నైష్టైస్తృప్యంతి దేవా న హి వహతి మరున్నిర్మలాభాని భాని .

ఆశాః శాంతా న భిందంత్యవధిముదధయో బిభ్రతి క్ష్మాభృతః క్ష్మాం

యస్మింస్త్రైలోక్యమేవం న చలతి తపతి స్తాత్స సూర్యః శ్రియే వః .. 87..

కైలాసే కృత్తివాసా విహరతి విరహత్రాసదేహోఢకాంతః

శ్రాంతః శేతే మహాహావధిజలధి వినా ఛద్మనా పద్మనాభః .

యోగోద్యోగైకతానో గమయతి సకలం వాసరం స్వం స్వయంభూ-

ర్భూరిత్రైలోక్యాచింతాభృతి భువనవిభౌ యత్ర భాస్వాన్స వోఽవ్యాత్ .. 88..

ఏతద్యన్మండలం ఖే తపతి దినకృతస్తా ఋచోఽర్చీంషి యాని

ద్యోతంతే తాని సామాన్యయమపి పురుషో మండలేఽణుర్యజూంషి .

ఏవం యం వేద వేదత్రితయమయమయం వేదవేదీ సమగ్రో

వర్గః స్వర్గాపవర్గప్రకృతిరవికృతిః సోఽస్తు సూర్యః శ్రియే వః .. 89..

నాకౌకఃప్రత్యనీకక్షతిపటుమహసాం వాసవాగ్రేసరాణాం

సర్వేషాం సాధు పాతాం జగదిదమదితేరాత్మజత్వే సమేఽపి .

యేనాదిత్యాభిధానం నిరతిశయగుణైరాత్మని న్యస్తమస్తు 

స్తుత్యస్త్రైలోక్యవంద్యైస్త్రిదశమునిగణైః సోంఽశుమాన్ శ్రేయసే వః .. 90..

భూమిం ధామ్నోఽభివృష్ట్యా జగతి జలమయీం పావనీం సంస్మృతావ- 

ప్యాగ్నేయీం దాహశక్త్యా ముహురపి యజమానాం యథాప్రార్థితార్థైః . 

లీనామాకాశ ఏవామృతకరఘటితాం ధ్వాంతపక్షస్య పర్వ-

ణ్వేవం సూర్యోఽష్టభేదాం భవ ఇవ భవతః పాతు బిభ్రత్స్వమూర్తిం .. 91..

ప్రాక్కాలోన్నిద్రపద్మాకరపరిమలనావిర్భవత్పాదశోభో

భక్త్యా త్యక్తోరుఖేదోద్గతి దివి వినతాసూనునా నీయమానః .

సప్తాశ్వాప్తాపరాంతాన్యధికమధరయన్యో జగంతి స్తుతోఽలం

దేవైర్దేవః స పాయాదపర ఇవ మురారాతిరహ్నాం పతిర్వః .. 92..

యః స్రష్టాఽపాం పురస్తాదచలవరసమభ్యున్నతేర్హేతురేకో

లోకానాం యస్త్రయాణాం స్థిత ఉపరి పరం దుర్విలంఘ్యేన ధామ్నా . 

సద్యః సిద్ధ్యై ప్రసన్నద్యుతిశుభచతురాశాముఖః స్తాద్విభక్తో 

ద్వేధా వేధా ఇవావిష్కృతకమలరుచిః సోఽర్చిషామాకరో వః .. 93..

సాద్రిద్యూర్వీనదీశా దిశతి దశ దిశో దర్శయన్ప్రాగ్దృశో యః 

సాదృశ్యం దృశ్యతే నో సదశశతదృశి త్రైదశే యస్య దేశే .

దీప్తాంశుర్వః స దిశ్యాదశివయుగదశాదర్శితద్వాదశాత్మా

శం శాస్త్యశ్వాంశ్చ యస్యాశయవిదతిశయాద్దందశూకాశనాద్యః .. 94..

తీర్థాని వ్యర్థకాని హృదనదసరసీనిర్ఝరాంభోజినీనాం

నోదన్వంతో నుదంతి ప్రతిభయమశుభశ్వభ్రపాతానుబంధి .

ఆపో నాకాపగాయా అపి కలుషముషో మజ్జతాం నైవ యత్ర

త్రాతుం యాతేఽన్యలోకాన్ స దిశతు దివసస్యైకహేతుర్హితం వః .. 95.. 

ఏతత్పాతాలపంకప్లుతమివ తమసైవైకముద్గాఢమాసీ-

దప్రజ్ఞాతాప్రతర్క్యం నిరవగతి తథాలక్షణం సుప్తమంతః .

యాదృక్సృష్టేః పురస్తాన్నిశి నిశి సకలం జాయతే తాదృగేవ

త్రైలోక్యం యద్వియోగాదవతు రవిరసౌ సర్గతుల్యోదయో వః  .. 96..

ద్వీపే యోఽస్తాచలోఽస్మిన్భవతి ఖలు స ఏవాపరత్రోదయాద్రి-

ర్యా యామిన్యుజ్జ్వలేందుద్యుతిరిహ దివసోఽన్యత్ర తీవ్రాతపః సా .

యద్వశ్యౌ దేశకాలావితి నియమయతో నో తు యం దేశకాలా- 

వవ్యాత్స స్వప్రభుత్వాహితభువనహితో హేతురహ్నామినో వః .. 97..

వ్యగ్రైరగ్ర్యగ్రహేందుగ్రసనగురు భరైర్నో సమగ్రైరుదగ్రైః 

ప్రత్యగ్రైరీషదుగ్రైరుదయగిరిగతో గోగణైర్గౌరయన్ గాం .

ఉద్గాఢార్చిర్విలీనామరనగరనగగ్రావగర్భామివాహ్నా-

మగ్రే శ్రేయో విధత్తే గ్లపయతు గహనం స గ్రహగ్రామణీర్వః .. 98..

యోనిః సామ్నాం విధాతా మధురిపురజితో ధూర్జటిః శంకరోఽసౌ

మృత్యుః కాలోఽలకాయాః పతిరపి ధనదః పావకో జాతవేదాః .

ఇత్థం సంజ్ఞా డవిత్థాదివదమృతభుజాం యా యదృచ్ఛాప్రవృత్తా-

స్తాసామేకోఽభిధేయస్తదనుగుణగుణైర్యః స సూర్యోఽవతాద్వః .. 99.. 

దేవః కిం బాంధవః స్యాత్ప్రియసుహృదథవాఽఽచార్య ఆహోస్విదర్యో 

రక్షా చక్షుర్ను దీపో గురురుత జనకో జీవితం బీజమోజః .

ఏవం నిర్ణీయతే యః క ఇవ న జగతాం సర్వథా  సర్వదాఽసౌ 

సర్వాకారోపకారీ దిశతు దశశతాభీషురభ్యర్థితం వః .. 100..

శ్లోకా లోకస్య భూత్యై శతమితి రచితాః శ్రీమయూరేణ భక్త్యా

యుక్తశ్చైతాన్పఠేద్యః సకృదపి పురుషః సర్వపాపైర్విముక్తః .

ఆరోగ్యం సత్కవిత్వం మతిమతులబలం కాంతిమాయుఃప్రకర్షం

విద్యామైశ్వర్యమర్థం సుతమపి లభతే సోఽత్ర సూర్యప్రసాదాత్ .. 101..

ఇతి శ్రీమయూరకవిప్రణీతం సూర్యశతకం సమాప్తం .